Kún tártibinde Qarýly Kúshterdiń, basqa da áskerler men áskerı quralymdarynyń bazalary men qoımalarynda qarý-jaraq pen oq-dárilerdiń qaýipsizdigi men saqtalýyn qamtamasyz etý, saqtaý obektilerin ornalastyrý jáne jaılastyrý baǵdarlamasyn iske asyrý máseleleri talqylandy.
Qorǵanys mınıstriniń orynbasary, general-maıor Baqyt Qurmanbaev oq-dárilerdi saqtaýdyń jalpy júıesi jáne onyń damý perspektıvalary, áskerı obektilerdiń ınfraqurylymyn jetildirý, sondaı-aq Arys qalasynda tótenshe jaǵdaılardy joıý men qalǵan oq-dárilerdi ornalastyrý jumystary týraly aıtyp berdi.
- Tehnıkalyq naýqan jospary aıasynda saqtaý obektilerinde qoımalarǵa, aýmaqty jaryqtandyrýǵa, tehnıkalyq kúzet quraldaryna jyl saıynǵy qyzmet kórsetý, ashyq saqtaý qoımalary men alańshalardy qulatý, bastyrmalardy, naızaǵaıdan qorǵaý qurylǵylaryn ornatý, tehnıkalyq aýmaqtardaǵy órt sóndirý sý qoımalaryn ornatý, jaramsyz oq-dárilerdiń tyǵyndaryn alý jáne aýystyrý jumystary júrgizilýde, - dedi ol.
Oq-dárilerdi saqtaý júıesin damytý úshin Qarýly Kúshterde oq-dáriler men saqtaý nysandaryn júzege asyratyn baǵdarlama men keshendi jospar quryldy. Olar qoldanystaǵy oq-dárilerdi saqtaý obektilerin jaılastyrýdy jáne shet elderdiń tájirıbesin eskere otyryp, jańalaryn salýdy kózdeıdi. Saqtaý obektileri shekaradan alystyǵy, eldi mekender men basqa da obektilerden, sondaı-aq basqa da qoımalardan qaýipsiz qashyqtyqta ornalasýy sııaqty talaptarǵa jaýap beretin bolady.
Aqtaý garnızonynyń áskerı bólimderinde Parlament depýtattaryna qarý-jaraq, áskerı tehnıka men múlikterdi saqtaýdyń, arnaıy medısınalyq quraldar bazasynyń sharttary, sonymen qatar QR QK áskerı-teńiz kúshteriniń kemeleri kórsetildi.
Áskerı nysandardyń ınfraqurylymymen tanysyp, depýtattar aıtylǵan problemalyq máselelerdi jáne olardy sheshý joldaryn talqylady. Qarý-jaraq pen oq-dárilerdi saqtaý obektilerin kóshirý jáne jaılastyrý baǵdarlamasynyń aralyq qorytyndylaryn atap ótti. Kóshpeli otyrys barysynda aıtylǵan syndarly usynystar zańnamany jetildirý aıasynda kórinis tabatyny aıtyldy.
Otyrysqa Qorǵanys mınıstrligi, Ulttyq ulan, Shekara qyzmeti, Tótenshe jaǵdaılar komıteti, Bas áskerı prokýratýra jáne oblys ákimdiginiń basshylary qatysty.
