«Kópir týraly másele bizge belgili. Prezıdenttiń tapsyrmasyn sózsiz oryndaımyz. Qazirgi kezde jobamyz bar. Az ýaqyttyń ishinde ózimizdiń arnaıy prosedýramyzdy ótkizemiz. Meniń oıymsha, osy jobaǵa bıýdjetten qarajat bólinedi. Múmkin oǵan basqa eldiń ınvestory tartylady», - dedi Danıal Ahmetov.
Sondaı-aq óńir basshysy kópir qurylysynyń jobasy boıynsha tenderlik prosedýra ótkiziletinin aıtty.
Eske salsaq, Memleket basshysy Qasym-Jomart Toqaev «Egemen Qazaqstan» gazetinde jaryq kórgen «Elý jyl burynǵy eski parom eldi qashanǵy áýrege túsiredi?» atty maqalada kóterilgen máselege nazar aýdaryp, óziniń Twitter-degi paraqshasyna Úkimetke Shyǵys Qazaqstan oblysy ákimdigimen birge Buqtyrma sý qoımasyna kópir salý úshin qarjy bólý máselesin qarastyrýdy tapsyrǵan edi.
Maqalada oblys ortalyǵy – О́skemen men óńirdiń búkil qala-aýdandaryn jalǵaıtyn, strategııalyq mańyzy zor Buqtyrma sý qoımasy arqyly ótetin «Qyzyl tý» ótkeli Kúrshim óńirine kelip-ketýshi jurtty ábden áýre-sarsańǵa salǵany jazylǵan.
Sondaı-aq konferensııa barysynda Danıal Ahmetov densaýlyq saqtaýdy damytýdyń keshendi jospary, bilim berý salasy, óńirdiń ınfraqurylymdyq damýy sekildi máselelerge toqtaldy.
