Senatorlar Maksın qus fabrıkasyna, «KazBeef Processing», «AgrimerAstyk» seriktestikterinde boldy jáne aýyl sharýashylyǵy ónimderin qaıta óńdeý máseleleri boıynsha keńes ótkizdi.
Sharaǵa aýyl sharýashylyǵy, ındýstrııa jáne ınfraqurylymdyq damý, densaýlyq saqtaý, saýda jáne ıntegrasııa mınıstrlikteriniń basshylary, ÚEU ókilderi, aýyl sharýashylyǵy ónimderin óndirýshiler qatysty.
Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń tóraǵasy Álı Bektaev Eýrazııalyq ekonomıkalyq odaq pen Dúnıejúzilik saýda uıymyna Qazaqstan Respýblıkasynyń múshe bolýy ishki jáne syrtqy naryqtarda jańa múmkindiktermen qatar básekege qabilettilikke joǵary talaptar qoıatynyn atap ótti. Á.Bektaev osyǵan baılanysty agroónerkásip keshenin memlekettik retteýdiń róli óte mańyzdy dep sanaıdy. Ol 28 qazanda Memleket basshysy «Qazaqstan Respýblıkasynyń keıbir zańnamalyq aktilerine agroónerkásiptik keshendi retteý máseleleri boıynsha ózgerister men tolyqtyrýlar engizý týraly» zańǵa qol qoıǵanyn, ol qujattyń maqsaty agroónerkásiptik keshendegi memlekettik saıasattyń tıimdiligin arttyrý jáne 2017-2021 jyldarǵa arnalǵan AО́K damytý memlekettik baǵdarlamasynyń negizgi erejelerin iske asyrýdy qamtamasyz etý ekenin habardar etti.
«Memleket basshysy Q.Toqaev aǵymdaǵy jyldyń 2 qyrkúıegindegi Qazaqstan halqyna Joldaýynda aýyl sharýashylyǵy ónimderi eksportynyń shıkizat baǵytynyń 70%-ǵa jetkenin, al qaıta óńdeý kásiporyndary barlyǵy 40%-ǵa artqanyn erekshe atap ótti», dedi Senat komıtetiniń tóraǵasy.
Statıstıkalyq derekterge sáıkes, 2018 jyly et ónimderin jáne sút ónimderin qaıta óńdeý salasynda óndiristik qýattardyń júktelýi 64%-ǵa jýyq; un tartý ónerkásibinde - 35-38 %; jarma óndirisinde - 43 %; makaron óndirisinde - 51% bolyp otyr.
Kórsetilgen salalardaǵy negizgi problemalardyń qataryna: shıkizat eksportynyń joǵary úlesi; shıkizat satyp alýǵa aınalym qarajatynyń jetkiliksizdigi; tehnologııalyq jabdyqtyń tozýy; daıyn ónimdi eksporttaý kezinde temirjoldyń joǵary tarıfi; GMO jáne basqa da ónimderdi ákelýge baqylaýdyń bolmaýy jatady.
«Osy jáne basqa da obektıvti sebepter aýyl sharýashylyǵynda qaıta óńdeý salasynyń damýyna óz áserin tıgizedi», dep atap ótti Á.Bektaev.
Kezdesý barysynda osy salanyń ózekti máselelerin talqylaý boıynsha qyzý pikirtalas ótti. Senatorlar men aýyl sharýashylyǵy ónimderin óndirýshiler ózderiniń eskertýleri men usynystaryn aıtty jáne ol budan bylaıǵy jumys barysynda pysyqtalyp, eskeriletin bolady.
