Onyń aty men artynda qalǵan murasyn qazaq halqynyń án jáne aspaptyq dástúrin qadirleýshi qaýym izet tutady, ol halqymyzdyń baı murasyn jáne ózindik ereksheligin alǵashqylardyń biri bolyp baǵalaı bildi jáne barynsha saqtaýǵa kúsh-jigerin jumsady. Mýzykant-tarıhshylar úshin onyń eńbekteri keńes bıliginiń alǵashqy onjyldyqtarynyń qıyndyǵy mol, degenmen mańyzy zor kezeńiniń jalǵyz jandy kýási bolyp tabylady. Ol óziniń ánder men kúılerdi óńdeýlerimen kompozıtorlarǵa dala dástúri negizinde akademııalyq mýzykanyń týyndaýyna jáne damýyna jol kórsetti.
«Mádenıet jáne sport mınıstrliginiń bastamasymen bıyl Aleksandr Zataevıchtiń 150 jyldyq mereıtoıyna oraı Reseıdegi ulttyq mýzyka murajaıynyń muraǵatynda zertteý júrgizildi. Bul murajaıda mátindik jáne fotoqujattar qory, sondaı-aq uly mýzyka zertteýshisiniń nota jazbalary saqtalǵan. Bul – qazaq mýzykasy úshin telegeı tabys. «Rýhanı jańǵyrý» baǵdarlamasy jáne Elbasy N.Nazarbaevtyń «Uly dalanyń jeti qyry» maqalalarynyń da kózdegeni – rýhanııatymyzdyń osyndaı asyl qazynalaryn túgendeý bolatyn, sol maqsat iske asyp, mine, búgin tamasha qoljazbalar kórermenderge jol tartty», dep atap ótti Mádenıet jáne sport mınıstrliginiń Mádenıet jáne óner isteri jónindegi departamenti dırektorynyń orynbasary Ǵanı Muratov.
Qazaq ulttyq konservatorııasynyń aǵa oqytýshysy, atalǵan qoljazbalardy zertteýshilerdiń, qurastyrýshylarynyń biri Valerııa Efımovna Nedlınanyń aıtýynsha mereıtoılyq saltanatty is-sharalar aıasynda Qazaqstan men Reseı muraǵattarynda qaýyrt jumystar júrgizildi. Onyń aralyq nátıjesi – halyq mýzykasynyń budan buryn jarııalanbaǵan notalarynyń jınaǵy – búgin jurtshylyqqa kórsetildi. Bul tek az ǵana bólshegi. Bul jumystar 1920-1930 jyldardaǵy mádenıettegi ahýal týraly qanshalyqty az biletinimizdi kórsetti. Bul asa zor qundylyq endi mýzykatanýshylar men jalpy jurtshylyqqa zor septigin tıgizedi.
Muraǵattyq zerdeleý men zertteýshiler qorytyndysy Elbasy Nursultan Nazarbaevtyń «Uly dalanyń jeti qyry» atty baǵdarlamalyq maqalasymen úndes bolyp otyr. Keń aýqymdy zertteýler, zamanaýı turǵydan baǵalaý, ejelgi jáne ótkendegi rýhanı baılyqty saqtaý jáne bizdiń mádenıetimizge qaıta keltirý qanshalyqty mańyzdy ekendigin kórsetedi.
Baspasóz konferensııasyna Qazaq Ulttyq konservatorııasynyń rektory Arman Ádilhanuly Júdebaev, ónertaný ǵylymdarynyń doktory, professor Jumabekova Dana Júnisbekqyzy, ónertaný ǵylymdarynyń doktory, professor Elemanova Saıda Abdrahımqyzy qatysty.
