Tokıoǵa bul jolǵy saparynda Dımash Qudaıbergen Japonııanyń NHK ulttyq arnasynda qonaqta bolyp, suhbat berdi. Bul – Dımashtyń Japonııaǵa alǵash kelýi. Japonııalyqtardyń ony qýana qarsy alǵanyn áleýmettik jelidegi jazbalarynan, áýejaıdaǵy fotolarynan baıqaýǵa bolady.
Japonııa aqparattyq portaldarynyń birqatary Dımashty kútip alýǵa myńǵa jýyq adamnyń jınalǵanyn jazady. «Olar Qazaqstannyń týyn ustap, plakattar jazyp, daıyndalyp kelgen» delingen basylym habarlamalarynda.
Billboard Japan portaly Dımashtyń japonııalyqtardyń da súıikti ánshisine aınalǵanyn aıtyp, ol úshin dástúrli festıvaldiń erejesine alǵash ret ózgeris engizilgenin habarlaıdy. Festıval zańyna sáıkes, ár qatysýshy óz ana tilinde án shyrqaýy kerek. Degenmen baıqaýdyń uıymdastyrýshylary Dımashqa ózin kóptiń kózaıymyna aınaldyrǵan S.O.S d'un terrien en détresse atty fransýz tilindegi ándi oryndaýyna ruqsat berdi. Portal habarlamasynda Dımashqa erekshe iltıpat kórsetilgeni, kórermenderdiń kóbi Dımashty kórý úshin jınalǵany jazylǵan.
Stalkfest áleýmettik jelisinde Dımashqa qatysty birneshe jazba jaryq kórgen. Onda japon halqynyń Dımashqa ystyq yqylasy men qurmeti týraly jyly lebizderin kórýge bolady. Biri qazaqstandyq ánshige shyǵarmashylyq tabys tilese, endi biri Japonııada konsert ótkizýin surapty. Jeli qoldanýshylary óz jazbalarynda Dımashty uzaq kútkenin, syılyqtaryn berýge asyqqanyn jazady.
Al festıvaldiń resmı paraqshasy Asia-Pacific Broadcasting Union-da Dımashtyń álemniń 12 tilinde án salatynyn jazypty. Sonymen qatar bul jerde konsertke qatysqan basqa da ónerpazdar týraly aqparat jarııalanǵan. Bizge tanystarynyń ishinde túrik ánshisi Mustafa Sandal bar. Túrkııa estrada juldyzynyń konsert sońynda Dımashpen túsirgen Instagram jelisindegi beınerolıgi kóptiń nazaryn aýdaryp, talqyǵa tústi. Mustafa Sandal Dımash Qudaıbergendi Túrkııaǵa shaqyratynyn aıtyp, Ystanbulda konsert berip, baýyrlas halyqty da qýantýyn suraıdy.
Ýkraınalyq ınternet-portal Gorlovka japonııalyq ónersúıer qaýymnyń ánshini qarsy alýǵa saqadaı saı kelgenin habarlap jazady. Aqparatqa súıensek, olar áýejaıǵa ónerpazdyń ánderin shyrqap, sózderin arnaıy plakattarǵa jazyp kelgen. Al eń bastysy, Tokıo áýejaıy ánshi kelgen sátte habarlamany Dımash úshin arnaıy qazaq tilinde jasaǵan. Muny estigen tyńdarmandar Dımashtyń «qazaq tilin álemge tanytsam» degen armanynyń oryndalyp jatqanyna qýanyshty.
Dımashtyń NHK Japonııa ulttyq arnasyna ana tilinde bergen suhbatyna oralatyn bolsaq, ánshi japonııalyqtarǵa alǵys aıtyp, alǵashqy sapary unap jatqanyn jetkizedi. Arna jýrnalısteri talaıdy tamsandyrǵan daýysynyń qupııasyn, ustazdary týraly suraıdy. Odan keıin álemniń talaı elinde óner kórsetip, mıllıondaǵan tyńdarmannyń súıikti ánshisine aınalǵan ánshiniń eline degen erekshe qurmeti men súıispenshiligine tánti ekenderin jasyrmaıdy. Jas ánshi Qazaqstanda týyp, qazaqtyń óner mektebinen tálim alǵanyna maqtanatynyn aıtady. Osy jerde dombyra týraly áńgime órbip, Dımash aspaptyń shyǵý tarıhy týraly áńgimelep beredi. Suhbat sońynda Dımash Qudaıbergen aldaǵy ýaqytta Japonııada da úlken konsert berip, japon halqyna dombyranyń sıqyrly únin estirtkisi keletinin jetkizdi.
Dımashtyń bul sapary da kóptiń kóńilinen shyqqany anyq. Onyń álemniń túkpir-túkpirdegi jankúıerleriniń sany taǵy birneshe mıllıonǵa artqany sózsiz.
