Búginde aımaqtaǵy «Jedel járdem» stansasy «Kómek-103» biryńǵaı jelisi boıynsha qyzmet kórsetedi. Taldyqorǵan qalasynda ornalasqan basqarý ortalyǵyna 21 bólimshe men 39 jedel kómek kórsetý beketteri qaraıdy.
- Jedel járdem qyzmetiniń jumysy kún saıyn qaýyrt ári ólsheýsiz. Soǵan qaramastan dárigerler óz qyzmetin qabaq shytpaı atqarýda. Men áriptesterimniń jumysyn erlikke balar edim, - deıdi oblystyq «Jedel járdem» stansasynyń dırektory Qanat Qaldybaev.
Bas dárigerdiń aıtýynsha, kezekshilik kezinde ár brıgada 15 shaqyrtýdan artyq qabyldamaýy tıis. Biraq ótinishterdiń kóptiginen dárigerler táýligine 27-28 adamnyń úıine barýǵa májbúr bolyp otyrǵan kórinedi. Qazir alǵashqy dárigerlik kómek kórsetý úshin 165 «jedel járdem» kóligi bir mezette kezekshilik etedi. Alaıda, shaqyrýshylar men shaǵymdanýshylardyń kóptigi jedel brıgadanyń jetispeýshiligin týǵyzýda.
- Bizdiń salamyzda 54 dáriger, 626 arnaýly qyzmetker jumys isteıdi. Kólik jetispeýshiligi týyndaıtynyn jasyrmaýymyz kerek. Mınıstrlikten qosymsha kólikpen qamtýdy surap otyrmyz. Aımaqtaǵy adam sanynyń úlesine shaqqanda, bizde ár aýysym saıyn 200 «jedel járdem» kóligi kezekshilik etýi tıis, - deıdi bas dáriger Qanat Qaldybaev.
