Bokstan Azııa chempıonaty men Ýnıversıada týrnıri aıaqtalǵannan keıin kóp uzamaı elimizde Qazaqstan boks federasııasy kýbogynyń saıystary da bastaldy.
Shildeniń 19-21-i aralyǵynda Astanadaǵy «Dáýlet» sport kesheninde soltústik aımaq quramalary ózara kúsh synasty. Munda Pavlodar, Shyǵys Qazaqstan jáne Almaty oblystarynyń komandalary bas qosty. Bir aıta ketetin jaıt, bıyl tórtinshi márte ótkizilip otyrǵan Kýbok jolyndaǵy jarystyń erejesi ózgerdi. Endi onyń reglamenti boıynsha bir kezeń qysqaryp, ol úsh lekte ótetin boldy.
Elordanyń tórinde ótken saıysta alań ıeleri úsh qarsylasynan da artyq kórindi. Olar birinshi jekpe-jekte Pavlodar oblysynyń komandasyn 8:2 etip utty. Osy kúni Almaty oblysynyń ókilderi Shyǵys Qazaqstan jasaǵynan basym tústi – 7:3. Týrnırdiń ekinshi kúnindegi eki kezdesýde de 9:1 degen esep tirkeldi. Astana bylǵary qolǵap sheberleri Altaıdyń aıasynan kelgen qarsylastaryn, al Almaty oblysynyń quramasy Pavlodardyń sarbazdaryn osyndaı eseppen tize búktirdi.
Jarystyń sońǵy kúni jartylaı fınalǵa beriletin jalǵyz joldamany Astana qalasy men Almaty oblysynyń ujymdary sarapqa saldy. Alǵashqy úsh urysta Azat Kamzınnyń – Mardan Berikbaevty, Ilııas Súleımenovtiń – Ernar О́rkendi, Meıirbolat Toıytovtyń Dıdar О́telbaevty utýlary arqyly elordalyqtar birden alǵa shyqty. Munda Ilııas óziniń qarsylasyn 2-raýandta nokaýtqa jiberdi. Budan keıin almatylyqtar Bekman Soılybaev pen Bekbolat Quramysov tıisinshe Darhan Jumsaqbaev pen Dáýlet Dáýkenovti utyp, esepti ekeýge qysqartty. Budan keıin Meıirim Nursultanov Baǵdat Naýqanovtan myqty shyǵyp, Esil boıy jigitteriniń eńsesin kótere tústi. Alaıda, osy tusta astanalyq Baqytjan Qojabekov kútpegen jerden Aıdos Erbolsynulynan jeńilip qaldy. Esesine, taǵy eki astanalyq sheber komandaǵa jeńis syılap, jartylaı fınaldyń da taǵdyryn sheship berdi. Olar –Dáýren Eleýsinov pen Vasılıı Levıt kezekterinde Arman Rysbek pen Arbek Ábdýǵanıevti jeńdi. Sondyqtan sońǵy jekpe-jekte almatylyq Dáýlet Musabaevtyń Ermek Úsenovti utýy jalpy jeńiske ózgeris engize almady.
Osylaısha, basty básekelesterin 6:4 etip súrindirgen Astana komandasy Qazaqstan boks federasııasynyń jartylaı fınalyna birinshi bolyp shyqty. Birinshi kezeńde kúsh synasatyn taǵy eki komanda 24 shildede Shymkentke márege jetetin «Ońtústik» dıvızıon, 29 shildede Aqtóbe men Qaraǵandyda aıaqtalatyn «Batys» jáne «Soltústik» dıvızıondar shaıqastarynda anyqtalady.
Jartylaı fınal men aqtyq kezdesýler jeltoqsan aıynda Astanada ótedi.
Rýslan IGILIK.
