arqasynda estý qabileti óte nashar balalar baıraqty básekelerde top jaryp júr
О́ńir basshysy S.Eskendirov oblystyq estý qabileti tómen balalar mektep-ınternatyna arnaıy keldi. Oǵan myna jaǵdaı sebep bolǵan edi. Munyń aldynda bilim uıasynyń qabyrǵasynda kóp jyldan beri jemisti jumys istep kele jatqan «Sensitive» bal bıi ansambliniń kórkemdik jetekshisi Olga Rostovshıkova «Nur Otan» HDP jergilikti fılıalynyń qabyldaýyna kelgen. Sońǵy úmit jibin úzip alǵysy kelmegendeı Samat Saparbekulynyń aldyna ımene kirip, ata-analardyń amanatyn baıandap bergen. Fılıal tóraǵasynyń máselemen ábden tanysyp alǵannan keıin «qam jemeńiz, kómektesemiz» degen bir aýyz sózi oǵan qanat bitirip, qabyldaýdan tóbesi kókke jetkendeı kóterińki kóńil-kúımen shyqqan. Júrekjardy qýanyshyn áriptesterimen bóliskenshe asyqqan. Endi she... elimizdegi biregeı baldyq bı toby Bolgarııada ótetin dodaly básekege qarjy tappaý saldarynan qap-qarańǵy túnek qushaǵynda tunshyqqandaı kúı keship júrgende, samala jaryq nurlandyryp sala berdi emes me. Osy kezde bizdiń oıymyzǵa Dıdar Malaev degen ónerli azamattyń mektep jasyna tola qoımaǵan ulyn Sofııa qalasyndaǵy halyqaralyq ánder baıqaýyna aparý úshin ıeligindegi kóligin bankke kepildikke qoıyp, ábden áýre-sarsańǵa túskeni oraldy.
Oblys ákimi ýádesinde turdy. Kelisilgen merzimde mektep-ınternatqa kelip, 150 balaǵa tálim-tárbıe berip jatqan 90-ǵa jýyq ujym músheleriniń halimen, oqý ornynyń materıaldyq-tehnıkalyq jaǵdaıymen tanysty. Bolgarııanyń Nesebr qalasynda halyqaralyq «Slavıanskıı pýt» ulttyq mádenıet, óner jáne qolóner jazǵy mektebiniń uıymdastyrýymen ótetin «Solnechnyı tanes» konkýrsyna joldama alǵan bı ansambiliniń ónerin tamashalap, estimeıtinderine qaramastan, bı ónerin ábden ıgerip alǵandaryna, onyń tylsym qudiretin jan-tánimen túsinetin sezimtaldyqtaryna tántiligin jasyrmady. Elimizde mundaı sanattaǵy bı ansambliniń jalǵyz ekenine bastapqyda senińkiremegenim ras. Qarap otyrsam, ataq-dańqtaryń jer jarady eken. Reseıdiń Cheboksary qalasynda uıymdastyrylǵan «Nasıonalnoe dostoıanıe-2013- NATIONAL. PROPERTY» konkýrsynda birinshi oryn alypsyńdar. Osy jarys jolyn Eýropa tórinde jalǵastyrýǵa, on eki múshesi saý órendermen terezesi teń dárejede óner kórsetip, júldemen oralýǵa tilektespin.
Osylaısha, aǵynan jarylǵan Samat Saparbekuly baldyq bı tobyna budan bylaı da turaqty qamqorlyq jasalatynyna sendirdi. Sóziniń aıaǵynda senderdeı jetkinshekterdiń tolyqqandy azamat bolyp erjetýine elimizde barlyq jaǵdaı jasalǵan. Elbasynyń senderge júktegen amanatyn abyroımen oryndańdar deı kelip, árli-berli jol shyǵyndaryn óteý jáne sheberlik synyptaryna qatysý úshin qarjylyq demeý kórsetti. Qazaqstannyń atyn shyǵara júrińder dep, bıshi balalarǵa elimizdiń Eltańbasy beınelengen fýtbolkalar syılady.
О́mir ESQALI,
«Egemen Qazaqstan».
Soltústik Qazaqstan oblysy.
