«Rýhanı jańǵyrý» baǵdarlamasy aıasynda Almaty qalasy ákimdiginiń qoldaýymen uıymdastyrylyp otyrǵan týrnırdiń alǵashqy kúni 4-17 jas aralyǵyndaǵy balalar men jasóspirimder óner kórsetedi. Kelesi táýlikte eresekter men ardagerlerdiń jekpe-jekterin tamashalaımyz. Al eń sońǵy kúni kásipqoı sportshylar jarys kórigin qyzdyrady. Osylaısha, úsh kún boıy «Almaty Arena» sport keshenine jınalǵan jurt alys jáne jaqyn shet memleketterden kelgen 1300-dep asa sheberlerdiń qatysýymen ótetin qyzyqty básekelerdiń kýási bolady.
Qazaqstan Respýblıkasy brazılııalyq djıý-djıtsý men grepplıng federasııasynyń vıse-prezıdenti Aqmaral Qanatbaevanyń aıtýynsha, osy sport túriniń basy-qasynda júrgen azamattar túrli qaıyrymdylyq is-sharadan da qalys qalyp júrgen joq. Máselen, aıtýly federasııanyń qamqorlyǵynyń arqasynda Almaty qalasy men Almaty oblysynda ornalasqan qos birdeı balalar úıinde osy sport túrine beıimdelgen arnaıy zal ashylyp, qajetti qural-jabdyqtarmen qamtymasyz etildi. Jas jetkinshekterdiń sheberlikterin shyńdaý maqsatynda olarǵa bilikti bapkerler bekitildi. Bul kúnderi balalar úıiniń bir top uldary men qyzdary sol úıirmelerde tegin daıarlanýda. Solardyń arasynan ozyp shyqqandary erteń Almatyda jalaýy jelbireıtin jarysta da óner kórsetedi.
ALMATY
