Jetisý jeriniń astyqty alqaby bolyp sanalatyn Kúreńbel óńirinde bıyl da aımaqtaǵy altyn oraq aldymen bastaldy. Osynaý jaýapty kezeńge Almaty oblysy ákiminiń orynbasary Tynyshbaı Dosymbekov arnaıy baryp, Kerbulaq aýdanynyń ákimi Baǵdat Álıev bastaǵan dıhandarmen júzdesti.
Egin basynda marjandaı tizilgen jeti kombaın dalanyń sary altynyn tógip-shashpaı orýda. Bes kúnniń ishinde alty júz gektarǵa jýyq astyq oryldy. Muhamet Nurelov tóraǵalyq etetin «Qarashoqy» óndiristik kooperatıvinde aýdannyń alpys azamaty jyl on eki aı jumyspen qamtamasyz etilse, egin orý naýqany barysynda jumysshylar sany júzge jýyqtaıdy. Negizinen bıdaıdyń «Odesskaıa-120» tuqymyn óndirýge baǵyttalǵan kooperatıvtiń 8 myń gektar aýdarmaly jeri bar. Bıyl 3,5 myń gektar jerge egin egilse, 3 myń gektarlyq alqap tynyqtyrylýda. Asyl tuqymdy bıdaımen qatar, 1,5 gektarǵa arpa egildi. Kooperatıv tóraǵasy bıylǵy aýa raıynyń qolaıly bolǵandyǵyn aıtyp, búgingi tańda ár gektardan jıyrma sentner ónim alyp jatqandyǵyn jetkizdi. Jaýyn-shashyn bolmasa, egin alqabyn tamyzdyń onyna deıin oryp alý josparlanýda.
«Jalpy, bıylǵy aýa raıy aýyl sharýashylyǵy salasy úshin qolaıly boldy. Sondyqtan aldyńǵy jylmen salystyrǵanda mol ónim alamyz degen senimdemiz. Oblys boıynsha 470 myń gektar jerge dándi daqyl egildi. Jaqynda ǵana barlyq aýdandardyń qatysýymen azyqtyq balans jasaldy. Bıyl 1,1 mln. tonna tóńireginde astyq bolady dep kútip otyrmyz. Bul mejege jetý úshin qazirgi kezde barlyq jaǵdaı bar. Aýdandarda egin orýǵa qatysatyn tehnıka júz paıyz jóndeýden ótip, jumys isteýde. Astyq saqtaıtyn qoımalar dezınfeksııalanyp, tarazylar da saqadaı-saı. Búgingi kúni 40 myń gektar jerdiń astyǵy oryldy. Bıylǵy ónim ortasha eseppen ár gektardan 23,5 sentner bolady degen boljam bar. Almaty oblysynyń ishki suranysyn qamtamasyz etý úshin 400 myń tonna bıdaı jetkilikti bolǵanymen, jergilikti daqyldyń ereksheligine baılanysty, qosymsha júz myń tonnadaı bıdaı soltústiktiń qatty dándi tuqymynan alynady», dedi Tynyshbaı Dosymbekuly.
Nurbol ÁLDIBAEV,
«Egemen Qazaqstan».
Almaty oblysy.
