Kóleńkeli bıznesti qyzdyrǵan
Tergeý málimetterine súıensek, býkmekerlik keńse Qazaqstan zańnamasynyń normalaryn buzyp, ǵalamtordyń kómegimen qyzmetin jasyryn júrgizgen kórinedi. Sáıkesinshe, budan memleket qazynasyna salyq túspegen eken.
«UQK Almaty qalasy boıynsha departamenti prokýratýra organdarymen birlesip, «Olımp» býkmekerlik keńsesi ákimshiliginiń zańsyz oıyn bıznesin uıymdastyrý faktisi boıynsha sotqa deıingi tergeý júrgizýge bastamashy boldy. Tergeý derekteri boıynsha, kompanııa Qazaqstan Respýblıkasynyń qoldanystaǵy zańnama normalaryn buza otyryp, belgili bir tabys tabýmen ınternet-resýrs arqyly lısenzııalanbaǵan áreketti júzege asyrǵan. Tıisinshe, osy salaǵa salyq salynbaǵan. Qazaqstan sheginen tys aqshalaı qarajatty zańsyz shyǵarý arnalary anyqtalyp, oqshaýlandy. Qarjy qylmystary salasyna jatatyn ózge de áreketter tirkelýde», delingen UQK taratqan resmı aqparatta.
Býkmekerlik keńselerge tosqaýyl qoıyldy
Femıda ókilderi «Olımp» BK saýda belgisimen kásibin órge domalatqan basqa da býkmekerlik uıymdardyń qyzmetine tosqaýyl qoıypty.
«2019 jylǵy 29 qarashada Almaty qalasynyń Mamandandyrylǵan aýdanaralyq ákimshilik soty «Olımp» BK saýda belgisimen «Only bet» JShS jáne «Alpha bet» JShS berilgen lısenzııa qoldanysyn 6 aı merzimge toqtat-
ty.
Qazirgi ýaqytta «Olımp» BK zańsyz áreketiniń, sondaı-aq salyq zańnamasyn buzýdyń naqty aýqymyn anyqtaý boıynsha tergeý is-sharalary júrgizilýde», dep naqtylady UQK.
Izi sýymaı, «Olımp» basshylyǵy resmı saıtta málimdeme jasap úlgerdi. Býkmekerlik kompanııanyń ákimshiligi lısenzııany toqtatýǵa qatysty sottyń sheshimine kelispeıtinin aıtyp, jaqyn arada shaǵymdanatyndaryn alǵa tartty.
Tartystyń sońy nemen aıaqtalady?
Osy rette bás tigetin uıymdar men zań organdary arasyndaǵy tartystyń órbigenine biraz bolǵanyn aıta ketken oryndy. Osydan eki aı buryn býkmekerlik keńse basshylary «Qumar oıyndar týraly» Zańǵa engizilgen túzetýlermen kelispeıtinderin aıtyp, osyǵan baılanysty óz oılaryn bildirip edi.
«2018 jyly bás tigetin kompanııalar shamamen 16,5 mlrd teńge salyq tóledi. 2019 jyly bul kórsetkish shamamen 20 mlrd teńgege jetedi. Bir mezette býkmekerlik keńseniń 5000-ǵa jýyq qyzmetkeri jumyssyz qalady. Qıyn áleýmettik-ekonomıkalyq jaǵdaıda bul jumyssyzdyqtyń ósýine ákeledi», degen bolatyn Almatydaǵy «Tennısı» býkmekerlik keńse dırektorynyń orynbasary Sergeı Kazakov.
Statıstıkany sóıletsek, byltyr zańsyz oıyn bıznesine qatysty 337 qylmystyq is tirkeldi. Bul kezeńde zańdy belshesinen basqan 6 uıymdasqan qylmystyq top anyqtaldy. 20 jasyryn jáne 74 elektrondy kazıno joıyldy, 1 105 oıyn avtomaty men termınal, 28 oıyn ústeli (poker ústeli, rýletka), 1 132 prosessor, 879 monıtor, 511 teledıdar, 88 kassalyq apparat, sol sekildi 29 beıne tirkegish tárkilendi. Qazaqstanda zańsyz oıyn mekemesin ashqany, ustaǵany nemese olar úshin úı-jaıdy berýmen qatar oıyn bıznesi salasyndaǵy qyzmetti lısenzııasyz júzege asyrǵany úshin Qylmystyq kodekstiń 307-baby boıynsha 7 jyl bas bostandyǵynan aıyrý jazasy kózdelgen.
Qumar oıynnyń quryǵyna túsken jandy raıynan qaıtarý ońaı sharýa emes. Bul jóninde «Egemen Qazaqstan» basylymynda san márte qaýzaldy. Alaıda, «Aýrýyn jasyrǵan óledi» demekshi, atalǵan salany zańdy turǵyda retteý kún tártibindegi másele. О́ıtkeni, bir keńseniń jumysyna tosqaýyl qoıylǵanymen qumartqan adam ekinshisine bas suǵatyny kúmánsiz. Bul ásirese ınternettegi bás tigetin uıymdarǵa qatysty. Sol sebepti býkmekerlik kásip qoǵamǵa ashyq bolýy tıis. Olaı bolmaǵan jaǵdaıda, sheteldik saıttarda bás tigetin otandastarymyzdyń sany arta túsedi degen de ýáj bar.
