Jańadan salynyp jatqan úıler men túrli nysandar qatary da kóp. Jyl saıyn kásip ashqandar sany da artyp keledi. Bir sózben aıtqanda, burynǵy men búginginiń arasynda aıtarlyqtaı aıyrmashylyq bar. Dese de 15 myńǵa jýyq turǵyny bar Sekseýil úshin basty másele – balalar bilim alatyn mektep.
Sekseýil arqyly iri temir jol toraby ótedi. Kenttegi 3 mekteptiń (№87, 31 jáne 177 mektep) barlyǵy kenttiń negizgi bóliginde ornalasqandyqtan, jańa aýdanda turatyn 360 oqýshy sabaqqa kelý úshin kúnde 13 relsti kesip ótedi. Munyń oıyn balasy úshin qaýipti ekeni aıtpasa da túsinikti. Ári 3 mekteptegi bala sany da shamadan tys kóbeıdi.
– Búginde kenttegi 150 balaǵa arnalǵan № 231 mektepte 480, 350 oryndyq №87 orta mektepte 804, al 700 oryndyq №177 orta mektepte 1138 oqýshy bilim alýda. Kelesi jyly 1 synypqa qabyldanatyn balalar sany da kóp. Demek, aldaǵy oqý jylynda aýdanda 3 aýysymdyq 2 mektep paıda bolýy múmkin.
Qazaqstan Úkimetiniń 2007 jylǵy 21 jeltoqsandaǵy №1256 qaýlysymen bekitilgen «Bilim berý uıymdary jelisiniń kepildik berilgen memlekettik normatıviniń» 2-tarmaǵynyń 3-tarmaqshasynda kishi jáne orta mektep jasyndaǵy oqýshylar sany 41 jáne odan kóp bolǵan jaǵdaıda negizgi orta bilim beretin memlekettik oqý ornynyń jumys isteýine kepildik beriletini jazylǵan. Sondyqtan da, balalardyń sapaly bilim alýy men qaýipsizdigin oılasaq, kenttegi jańa aýdanǵa 300 oryndyq mektep salý qajet, – deıdi aýdandyq bilim bóliminiń basshysy Sanıra Jannazarova.
Osy másele jóninde byltyr aýdan ákimi Muhtar Orazbaev oblys basshylyǵyna hat jazyp, sonyń negizinde oblystyq bilim basqarmasy Bilim jáne ǵylym mınıstrligine 2019 jyly respýblıkalyq bıýdjet esebinen kentte 300 oryndyq mektep salý týraly usynys beredi, memlekettik saraptamadan ótken jobalyq smetalyq qujattaryn da qosa joldaıdy. Qujatta jańa mektep qurylysyna 849 mln 155 myń teńge qajettigi kórsetilgen. Biraq, mınıstrlik tarapynan áli kúnge mardymdy jaýap joq.
Mine, 2019 jyldy da túgesýge taıadyq. Balalar áli temir joldy árli-berli kesip ótip júr. Olardyń joldy saptaǵy sarbazdaı bir syzyqpen ótpeıtini taǵy anyq. Árıne ótkel joq emes, bar. Biraq onyń da asa qaýipsiz emestigin jazda Shamalǵanda bolǵan oqıǵa kórsetti. Betin ári qylsyn, biraq balalar temir joldyń boıynda oqys jaǵdaıǵa ushyrap qalsa kim jaýap beredi?
Qazir mekteptegi bilim sapasy, bala qaýipsizdigi, pedagogter mártebesi Memleket basshysynyń nazarynda turǵan basty máselelerdiń biri. Endeshe, qııýyn taýyp, qısyny kelip turǵan isti saǵyzsha sozýǵa ne sebep bolyp otyr?
Árıne, qazir mektep qurylysyna qajetti 850 mıllıon teńge bıýdjet úshin ájeptáýir salmaq ekeni anyq. Biraq, tarazynyń bir basynda balalardyń ómiri turǵanyn umytpaıyq.
Temir joldyń boıynda top bala júr. Al olardy sabaqqa jibergen áke-sheshe kóńilinde «Balam oqys jaǵdaıǵa ushyrap qalmasa eken» degen alań bar...
Qyzylorda oblysy
