Ulttyq sport úzdikteri anyqtaldy

• 10 Jeltoqsan, 2019

Ulttyq sport úzdikteri anyqtaldy

39 ret kórsetildi

El kindigi elordada Ulttyq sport túrleri qaýymdastyǵynyń uıymdastyrýymen bıylǵy atqarylǵan jumystar nátıjesi qorytyndylanyp, keler jyldyń josparyn naqtylaýǵa arnalǵan alqa májilisi ótti. Jıynǵa Mádenıet jáne sport mınıstrliginiń ókilderi, oblystardaǵy ulttyq sport mektepteri men klýb basshylary, federasııa tóraǵalary hám jattyqtyrýshy-tóreshiler qatysty.

Beken QAIRATULY

Májilistiń mańyzy jaıly túsindirgen Ulttyq sport túrleri qaýymdastyǵynyń prezıdenti Bekbolat Tileýhan barlyq mádenı-sporttyq sharalar Elbasy N.Á.Nazarbaevtyń «Bolashaqqa baǵdar: rýhanı jańǵyrý» jáne «Uly dalanyń jeti qyry» atty maqalalarynda aıtylǵan baǵdarlamalyq ıdeıalardy iske asyrý maqsatynda jasalyp jatqanyn atap ótti.

Odan keıin atalǵan qaýymdastyqtyń atqarýshy dırektory Nursultan Ibragımov alqaly jıynǵa qatysýshylarǵa bıyl atqarylǵan jumystar jaıly esep berdi. Onyń aıtýynsha, kókpardan 2 halyqaralyq, 4 respýblıkalyq jarys, 2 respýblıkalyq týrnır; aýdaryspaqtan 1 halyqaralyq, 5 respýblıkalyq jarys, 2 respýblıkalyq týrnır; teńge ilýden 1 halyqaralyq, 4 respýblıkalyq jarys, 1 respýblıkalyq týrnır; jamby atýdan 6 halyqaralyq, 4 respýblıkalyq jarys, 1 respýblıkalyq týrnır; báıge túrlerinen 1 respýblıkalyq jarys, 2 respýblıkalyq týrnır; qusbegilikten 1 halyqaralyq, 3 respýblıkalyq jarys, 1 respýblıkalyq týrnır ótkizilipti. Iаǵnı, sportshylarymyz osy jyly 13 halyqaralyq, 22 respýblıkalyq jarys pen 9 respýblıkalyq týrnırge qatysypty.

Sonymen qatar bıylǵy 19-22 sáýir aralyǵynda Almaty qalasynda Dúnıejúzilik etnosport konfederasııasynyń II halyqaralyq quryltaıy ótip, oǵan álemniń 40-tan astam elinen 150-ge jýyq ókil kelip qatyssa, 30 mamyr men 2 maýsym aralyǵynda Nur-Sultan qalasy ákimdigimen birlesip uıymdastyrǵan «Nur-Sultan Ethno Fest» merekesi elorda turǵyndary tarapynan keń kólemde qoldaý tapqan eken.

Sol sııaqty bıyl jalpy júlde qory 54 mıllıon teńgeni quraıtyn Atyraý oblysy Mahambet aýdany Taldykól aýylynda ótken «Daraboz-2019» halyqaralyq týrnıri; Almaty oblysy Raıymbek aýdanynda uıymdastyrylǵan «Sonar-2019» halyqaralyq qusbegiler týrnıri; Aqmola oblysy Býrabaı óńirinde qusbegi Másip Batyrhanuly atyndaǵy búrkitshilerdiń halyqaralyq jarysy qatarly sharalar ulttyq sporttyń ajaryn ashsa, aldaǵy 2020 jylǵy aqpan aıynda aýdaryspaqtan «Qazaqstan Qabylany» atty joba jalaýyn kótermek kórinedi.

Kelesi kezekte sóz alǵan Mádenıet jáne sport mınıstrligi Sport jáne deneshynyqtyrý isteri komıteti Ulttyq sport túrleri basqarmasynyń basshysy Qarlyǵash Ramazanova keltirgen resmı málimetten túıgenimiz, ulttyq sport túrimen 2017 jyly 343 myń adam shuǵyldansa, ótken jyly bul kórsetkish 376 myń adamdy quraǵan. Qazirgi tańda elimiz kóleminde ulttyq sport túrlerinen 8 mamandandyrylǵan sport klýby jáne 13 mamandandyrylǵan sport mektebi jumys istep tur. О́tken jyldyń qorytyndysy boıynsha respýblıkalyq deńgeıde 86 is-shara, onyń ishinde 50 respýblıkalyq, 36 halyqaralyq jarys ótken.

– Qazirgi tańda kún tártibinde turǵan basty másele 2021 jyly elimizde ótýi tıis Búkilálemdik etnosport oıyndary, – dedi Qarlyǵash Ásetqyzy. Bul baǵytta mınıstrlik pen qaýymdastyq jáne ulttyq sport túrleri federasııalary birlese jumys jasaýymyz qajet. Uıymdastyrý komıteti qurylyp, onyń turaqty otyrystarynda oıyndardy uıymdastyrý men ótkizý máseleleri talqylanýy tıis.

Alqaly jıyn barysy tústen keıin úzdikterge arnaıy beriletin «Altyn tuǵyr-2019» marapatyna ulasty. Osymen jetinshi márte uıymdastyrylyp otyrǵan syılyqtyń «Úzdik mergender» sanaty boıynsha – Aıkóz Eralhan men Babajan Baqdáýlet, «Úzdik báıge attary» – «Qoıanqasqa», «Úshqońyr», «Qyzjıren», «Úzdik aýdaryspaqshylar» – Amanjol Nurbek, Quralbaı Ermek, Narmaǵanbet Imanǵazyuly, Aǵabek Ǵabıt, «Qazaq kúresiniń úzdik balýany» – Narıman Tutqyshev, «Úzdik toǵyzqumalaqshy» – Ǵalymjan Temirbaev, «Úzdik búrkitshi» – Serikbolsyn Jalǵasuly, «Úzdik teńge ilýshi» – Ǵalymjan Izjanov, «Úzdik kókpar komandasy» – jastar quramasy, «Úzdik kókparshy» – Qurmanbek Turǵanbek, «Úzdik tóreshi» – Erlan Júsipov, «Úzdik jattyqtyrýshy» – Arslan Qabjanov, «Úzdik ulttyq sport klýby» – «Áýlıe ata» sport klýby, «Jappaı kókpar úzdikteri» bolyp Ǵalymjan Myrzabaev pen Jomart Zııabek tanyldy.

Sondaı-aq ulttyq sportqa eńbek sińirgen tulǵalarǵa beriletin «Elimjan» medali Almaty oblysynyń ákimi Amandyq Batalov pen Ulttyq Olımpıada komıtetiniń bas hatshysy Sáken Musaıbekovke tabys etildi.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz