Janseıit Túımebaev gazet ujymyn Táýelsizdik kúnimen tuspas-tus kelgen ǵasyrlyq mereıtoıymen quttyqtap, birqatar jýrnalısti marapattady.
«Egemen Qazaqstan» gazetiniń mereıtoıy jyl basynan beri toılanyp keledi. Búgin qarashańyraqqa kelip, gazet ujymyn arnaıy quttyqtaýdy jón kórdik. «Egemen» respýblıkamyzda shyǵatyn barsha basylymnyń bastaýshysy, uzaq jyldardan beri qazaq halqynyń múddesin qorǵap kele jatqan birden-bir gazet. Osy jolda qyzmet etip, jazyp júrgen, tehnıkalyq jaǵynan qamtamasyz etetin ózderińiz sekildi ujymnyń eńbegi zor. Sizderdiń eren eńbekterińiz úshin alǵys bildiremin, bastysy zor densaýlyq, otbasylaryńyzǵa amandyq jáne shyǵarmashylyq tabys tileımin», - dedi J.Túımebaev.
Sondaı-aq birqatar jýrnalıst Qazaqstan halqy Assambleıasynyń marapatyna ıe boldy. Ultaralyq kelisim men jalpyulttyq birlikti nyǵaıtýǵa úles qosqany úshin «Egemen Qazaqstan» gazetiniń sholýshysy Anar Tóleýhan men jýrnalıst Maıgúl Sultan «Meıirim tósbelgisimen» marapattaldy. Ekonomıka bóliminiń meńgerýshisi Arnur Asqar, gazet sholýshysy Beken Qaıratuly, qurmetti ardagerler Berik Sadyr men Jylqybaı Jaǵyparuly, jýrnalıst Orynbek Pazylov, Erkejan Aıtqazy jáne Svetlana Ǵalymjanqyzyna alǵys hattar tabystaldy.
Jıyn sońynda «Egemen Qazaqstan» gazetiniń basqarma tóraǵasy Darhan Qydyráli qonaqtarǵa alǵys bildirip, Janseıit Túımebaevqa mereıtoıǵa arnaıy daıyndalǵan 100 jyldyq tarıhty qamtıtyn gazet tigindisiniń elektrondy nusqasyn, ǵasyrlyq foto-shejire jınaqtalǵan albom men «Egemen Qazaqstan» gazetiniń «Júz jyldyq jylnamasynyń» bes tomyn tabys etti.
