Elimizde turǵyn sany az aýyldyq óńirlerdegi medısına nysandaryn ońtaılandyrý bastaldy. Densaýlyq saqtaý mınıstriniń 236-buıryǵy boıynsha, adam sany 5000 turǵynnan kem aýyldyń barlyǵynda qysqartý júrgizilýde. Al Lepsi aýylynyń halqy qazir bul mejege de jetpeıdi eken.
-Turǵyndarǵa bul ońtaılandyrýdyń jaıy túsiniksiz bolyp otyr. Aýyldaǵy aýrýhana qysqarsa, naýqastarǵa alǵashqy jedel kómekten basqa qyzmet alý úshin 220 shaqyrym jerdegi aýdan ortalyǵyna nemese 180 shaqyrym qashyqtyqtaǵy Taldyqorǵan qalasyna barýyna týra keledi. Ásirese, aýyrǵan bala men júkti áıelderge qıyn tıetini ókinishti. Biraq, amal neshik, aýylda adam sany az. Bári qalaǵa nápaqa izdep kóship jatyr. Munda temirjol men Balqash kólinen balyq aýlaýdan basqa kúnkóris kózi joq. Lepsidegi halyqty ustap turǵan depo jabylǵaly halyq bosyp ketti. Aýyldaǵy polısııa bólimi de qysqaryp, ýchaskelik pýnktke aınaldy. Bankter bankomatyn japty. Zeınetkerler aı saıynǵy zeınetaqysyn alý úshin qalaǵa taksı arqyly kartasyn berip jiberip jatyr, deıdi aýyl belsendisi Rýslan Sáttibekov.
Aıtpaqshy, osy Sarqan aýdanynda jyl sońyna deıin jańa aýrýhana paıdalanýǵa berilmekshi. Quny 2 mlrd 400 myń teńge turatyn joba buǵan deıin «saqaldy qurylystyń» qatarynda turǵan 2500 sharshy metr ǵımaratqa jan bitirdi. Endi munda kúnine 100 adamǵa qyzmet kórsetetin, 105 oryndyq aýdanaralyq aýrýhana jumysyn bastaıdy.
