«Mınıstrlik qurylǵan 2016 jyldan beri «sheteldik fılmder qaptap» ketti degen máseleni aldymen qolǵa aldyq. Osy jumys aıasynda jyldan-jylǵa otandyq telehıkaıalar sanyn kóbeıtip jatyrmyz. Bul álemge elimizdi, eldigimizdi, dástúrimizdi tanytatyn jaqsy mysaldardyń biri dep esepteımiz. Kelesi jyly Abaıdyń, ál-Farabıdiń mereıtoılary kele jatyr. Kópshilik nazaryna usynylǵan bul joba – sol bastamalardyń biri ǵana dep qabyl alyńyzdar», - dedi tarıhı jobanyń júzege asýyna qoldaý bildirgen sala basshysy.
«Orbulaq shaıqasy» - 1643 jyly Orbulaq mańynda 50 myń qolǵa tótep bergen 600 qazaq sarbazy týraly túsirilgen alǵashqy telehıkaıa.
«Bul serıal - tarıhty túgendeý isine qosqan úlesimiz. «Orbulaq shaıqasy» telehıkaıasynyń túsirilimderi Almaty, Jambyl, Túrkistan oblystarynda jáne Orbulaqtyń ózinde júrgizildi. Tarıhı serıaldardy túsirý - óte kúrdeli ári qymbat prosess. Sondyqtan bul baǵytta ázirge tek memlekettik arnalar ǵana qadam jasap keledi. Biz jyl saıyn tarıhı serıaldar sanyn kóbeıtý mindetin alǵa qoıyp otyrmyz. Kelesi jyly Abaı men ál-Farabı telehıkaıalary túsiriledi», - dedi «Qazaqstan» respýblıkalyq teleradıo-korporasııasynyń Basqarma tóraıymy Lázzat Tanysbaı.
Aıta keteıik, telehıkaıanyń prodıýseri buǵan deıin «Keıki mergen», «Tar zaman» tarıhı týyndylaryn túsirgen Murat Bıdosov, keńesshisi - jazýshy, Memlekettik syılyqtyń ıegeri Beksultan Nurjekeev.
8 bólimdi telehıkaıa «Qazaqstan» Ulttyq telearnasynan 16-17 jeltoqsan kúnderi caǵat 14:50-de kórsetiledi.
