Ákesi orta dáýletti sharýa adamy bolǵan kórinedi. Moldaǵalı aýyl moldasynan saýat ashyp, Qarasýdaǵy orys-qazaq mektebin úzdik bitirip shyǵady. 1910 jyly Orynbor orys-qazaq muǵalimder mektebin támamdaıdy. 1910-1918 jyldary qoǵamdyq jumystarǵa da belsene aralasady. “Aıqap” jýrnalyna, “Qazaq” gazetine eńbekshi halyqtyń muń-múddesin kózdeıtin maqalalary jaryq kórip turdy. Oral oblysyndaǵy Qazaq sezin uıymdastyrýshylardyń biri boldy. Osy basqosýda aýyl muǵalimderi tobynyń beıresmı jetekshiligine saılandy. Munan keıin oblys qazaqtarynyń Qaratóbede ótken sezine delegat bolyp qatysty. “Aq jol” saıası uıymyna kirdi.
Azamat soǵysy bastalǵan kezde aýylda boldy. 1919 jyly Oral qalasyna kelip, RK(b)P qataryna ótýge ótinish berdi. 1920 jyly Jympıty ýezdik revkomynyń ýaqytsha quramyna tóraǵalyq etti. Sol jylǵy qazan aıynda Oral oblysy delegasııasynyń tizimimen QAKSR OAK músheligine kandıdat bop bekitildi. 1921 jyldyń kókteminen bastap RK(b)P Jympıty ýezdik komıtetiniń tóraǵasy, 1921-1922 jyldary Oral gýbernııalyq atqarý komıteti tóraǵasynyń orynbasary bolyp istedi.
M.Joldybaev munan keıin Orynborǵa qyzmetke shaqyrylyp, QAKSR Halyq aǵartý komıssarıatynyń ǵylym, baspasóz jáne ádebıet isin basqaratyn akademııalyq ortalyǵynyń (Qazaqstan Bilim ordasy) tóraǵasy bolyp taǵaıyndalady. RK(b)P qazaq ólkelik komıtetiniń baspasóz organy – “Eńbekshi qazaq” gazetin qazaq ádebıetiniń beldi de bedeldi jazýshylary Beıimbet Maılın men Sáken Seıfýllın kezek-kezek basqaryp turǵan 20- jyldardyń ortasyna taman jaýapty redaktorlyqqa keledi. Sóıtip ol qalamy ushqyr jýrnalıst retinde tanyldy, belsendi gazet avtorlary tobyn tárbıeledi. Olardyń arasynan keıin T.Júrgenov sekildi memleket qaıratkeri, S.Muqanov, E.Aldońǵarov sııaqty tanymal qalamgerler shyqty.
M.Joldybaev 1927 jyldan bastap shyǵa bastaǵan ulttyq pedagogıkalyq arnaýly basylym – “Jańa mektep” (“Qazaqstan mektebi”) jýrnalynyń alǵashqy redaktory. 1933-1937 jyldary BK(b)P OK janyndaǵy marksızm-lenınızm ınstıtýty Qazaq fılıalynyń qyzmetkeri. Osy jerde júrgende burynǵy Alash qozǵalysyna qatysqany úshin “halyq jaýy” degen aıyppen tutqynǵa alynyp, 1938 jylǵy aqpan aıynda atyldy.
