Jastaıynan Turar jalshylyqta júrip, baılardyń malyn baqty. 1907 jyly Qyrǵyzbaev degen jalǵan tek alyp Merkidegi buratanalarǵa arnalǵan oryssha-qazaqsha bastaýysh mektepke túsedi. 1910-1914 jyldary Bishkektegi aýylsharýashylyq mektebinde oqıdy. 1916 jyly Tashkenttegi muǵalimder ınstıtýtyna qabyldanady. Biraq ony aıaqtaı almaıdy. Qazaqstan men Orta Azııada ult-azattyq kóterilisi burq ete qalyp, T.Rysqulov soǵan belsene atsalysady. Áýlıeatadaǵy kóterilistiń uıymdastyrýshysy retinde tutqynǵa túsedi. Odan qutylyp shyqqannan keıin de óziniń ıdeıalyq maqsatynan aınymaıdy.
1917-1918 jyldary Áýlıeata ýezdik Sovdepi atkomynyń tóraǵasy bolady. Odan ári Túrkistan densaýlyq saqtaý halkomy, Túrkistan OAK tóraǵasynyń orynbasary, tóraǵasy, RSFSR Ult isteri komıssarıatynyń qyzmetkeri, alqa múshesi, halkomnyń ekinshi orynbasary bolyp isteıdi.
1924-1926 jyldary Komıntern AK Orta-Shyǵys bólimi meńgerýshisiniń orynbasary, sonymen qatar 1924 jyldyń ortasynan 1925 jyldyń shildesine deıin Komınternniń Mońǵolııadaǵy ýákili, 1926 jyly BK(b)P qazaq ólkelik komıteti baspasóz bóliminiń meńgerýshisi jáne ólkelik “Eńbekshi qazaq” gazetiniń jaýapty redaktory qyzmetterin atqardy. 1926 jyldyń maýsymynan 1937 jyldyń shildesine deıin RSFR halkomsovy tóraǵasynyń orynbasary bolyp, repressııaǵa ushyrady.
