О́ziniń quttyqtaý hatynda Japonııa Imperatory Narýhıto Qasym-Jomart Toqaevqa baq-dáýlet, al Qazaqstan halqyna órkendeý tiledi.
Germanııa Prezıdenti Frank Valter-Shtaınmaıer Qasym-Jomart Toqaevty Táýelsizdik merekesimen quttyqtaı kele: «Qazaqstanda turatyn etnıkalyq nemister bizdiń elderimizdiń arasynda «kópir» ornatty. Sizdiń elińiz ben aımaǵyńyzdyń bolashaǵy dıalogqa, reformalarǵa jáne ashyqtyqqa baǵyttalǵan. Bul rette Germanııa bolashaqta da Siz úshin senimdi seriktes bolyp qala beredi», – dep jazǵan.
Iordanııa Koroli Abdalla II óziniń halqy men úkimeti atynan elimizge úzdiksiz progress pen órkendeý tiledi.
Italııa Prezıdenti Serdjo Mattarella: «Ýaqyt óte kele qalyptasqan saıasat, ekonomıka jáne mádenıet salasyndaǵy yntymaqtastyq nyǵaıyp keledi. Bizdiń baılanystarymyz Nur-Sultan men Eýropalyq Odaq arasyndaǵy qatynastardyń aıasynda da odan ári damı beretinine senimdimin», – dedi jedelhatta.
Polsha Prezıdenti Andjeı Dýda Qazaqstannyń Ortalyq Azııadaǵy eń mańyzdy seriktes ekenin atap ótken. «Bizdiń memleketterimizdiń tyǵyz baılanystary artyp keledi. Polsha Qazaqstannyń álemdik arenadaǵy belsendiligin, ásirese, Ortalyq Azııadaǵy qaýipsizdik, ıadrolyq qarý taratpaý jáne mádenıetaralyq dıalog máselelerine qatysty ustanymyn joǵary baǵalaıdy», – dep jazǵan jedelhatta.
Izraıl Prezıdenti Reýven Rıvlın Táýelsizdik kúnine arnalǵan quttyqtaýynda, eki el arasyndaǵy ınnovasııalyq jáne tehnologııalyq baılanystardyń artyp kele jatqanyn atap ótken.
Fınlıandııa Prezıdenti Saýlı Nıınıstıo Qasym-Jomart Toqaevqa sáttilik pen zor densaýlyq, al Qazaqstan halqyna beıbitshilik jáne gúldený tiledi. «Elderimiz arasynda burynnan qalyptasqan óte jaqsy dostyq qarym-qatynasymyzdy odan ári nyǵaıta túsýge nıettimiz», – delingen jedelhatta.
Shveısarııa Konfederasııasynyń Prezıdenti Ýlı Maýrer Prezıdent Qasym-Jomart Toqaevtyń resmı qyzmetine jáne Qazaqstan halqyna jarqyn bolashaq tiledi. Ýlı Maýrer qyrkúıektiń 24 kúni Nıý-Iorkte jáne qarashanyń 22-inde Nur-Sultanda bolǵan kezdesýlerge rızashylyǵyn bildirdi. «Bizdiń kezdesýlerimiz elderimizdiń arasyndaǵy dostyq baılanystardy qaıta jańǵyrtýǵa múmkindik berdi. Shveısarııa eki taraptyń da ıgiligi úshin Qazaqstan Respýblıkasymen berik qarym-qatynastardy saqtaýǵa nıetti», – dep jazylǵan.
Serbııa Prezıdenti Aleksandr Výchıch óziniń quttyqtaý jedelhatynda: «Sizdiń óz isińizge adaldyǵyńyzdyń arqasynda elińiz Tuńǵysh Prezıdent – Elbasy Nursultan Nazarbaev salyp ketken sara joldan aınymaı damyp keledi. Osyǵan qurmetim sheksiz. Joldaýyńyzda Konstrýktıvti jáne qoǵamdyq dıalog – Qazaqstannyń turaqtylyǵy men gúldenýiniń negizi, dep atap ótkensiz», – dep jazǵan jedelhatta.
Mońǵolııa Prezıdenti Haltmaagıın Battýlga Qasym-Jomart Toqaevty jáne Qazaqstan halqyn Táýelsizdik merekesimen quttyqtady. Ol Mońǵolııa men Qazaqstan arasyndaǵy dostyq qarym-qatynastardyń damýyn atap ótti. «Aldaǵy ýaqytta da saıası qarym-qatynastarymyzdy odan ári nyǵaıtyp, eń joǵary deńgeılerde ózara saparlarmen belsendi jáne júıeli túrde almasatyn bolamyz», – dep jazǵan jedelhatynda.
Sondaı aq, Qazaqstan Táýelsizdiginiń 28 jyldyǵyna oraı Qasym-Jomart Toqaevtyń atyna quttyqtaý jedelhattaryn Bahreıin Koroli Sheıh Hamad ben Isa Ál Halıfa, Lıtva Prezıdenti Gıtanas Naýseda jáne Rýmynııa Prezıdenti Klaýs Verner Iohannıs joldaǵan.
