Anardyń týǵan jeri – Shyǵys Qazaqstan oblysy, Qotanqaraǵaı aýdany. Ákesi Tólegen Rahymjanov kóp jyl mektep dırektory mindetin atqarǵan ólkege óte tanymal pedogog. Mamandyǵy ádebıetshi. Kezinde KazGÝ-de bilim alǵan. Tókeńniń dıplom jumysyna akademık Muhtar Áýezov jetekshilik etken hám asa joǵary baǵa bergen. 2010 jyly dúnıeden ótken qalamgerdiń artynda «Týǵan jer seni jyrlaımyn», «Býyrqanǵan Buqtyrma», «Asyl daryn» atty jyr jınaqtary jáne «О́leńmen órilgen ómir» atty esteligi qaldy.
Ádebıetshi-qalamger otbasynda týyp, qazaqy tárbıege shomylyp ósken Anar qaryndasymyz da áke jolyn qýyp ádebıetshi bolamaqqa nıet etkenimen joly bola qoımapty. Sodan 1985 jyly Almaty qalasynda kelip qurylysta nesibesin aıyryp júrgen. Jeltoqsan daýyly kóterilgen 16-sy kúni Anar qyz qasynda synyptasy Gúlshat bar jastarmen birge alańǵa entelep jetip barmaı ma. Halyq kóp.
– Tús aýyp qalǵan kez edi, - dep eske alady qaryndasymyz: – Jastar men mılısııanyń qaqtyǵysy bastalyp ketti. Apyr-topyrda qurbym Gúlshattan kóz jazyp qaldym. Qoldarynda dýbınkalary bar top jasaq jastardy keri tyqsyrǵan kezde, men muzǵa taıyp ushyp tústim. Dereý úsh mılısııa qazaq jigiti meni julqyp turǵyzyp, súırep ala jóneldi. «О́zim júremin» dep aıqaı salǵanym esimde... Arada jyldar ótti. 2010 jyldyń bir kúni Jańaqorǵanda turyp jatqan baıaǵydaǵy qurbym Gúlshat habarlasty. Ol «gazetterde jarııalanyp júrgen sýretińdi kórdiń be?» dedi. «Joq, ol qandaı gazet?». Dereý gazetti taýyp alyp qarasam, bir top mılısııanyń qorshaýynda aıdalyp bara jatqan dál ózim. Ústimde shaqpaq palto. Shashym qıylǵan, buıra. О́ıtkeni eki kún buryn shashymdy qıyp, hımııa saldyrǵanmyn. Meni ustap alyp ketip bara jatqan kezde alańda sýretke túsirip alypty. Bul sýrettiń tarıhy osy, - dedi Anar Raqymjanova.
Anar Tólegenqyzy qazir Almaty da turady, shaǵyn saýda orny bar. Joldasy Marat Baıekenov ekeýi bala-shaǵasyn ósirip, aman-esen júrip jatyr.
