QHDR astanasy Phenıan qalasynyń Kım Ir Sen atyndaǵy alańynda koreı soǵysynyń aıaqtalǵanyna 60 jyl tolýyna oraı áskerı sherý bolyp ótti. Bul týraly ITAR-TASS habarlady.
Soltústik Koreıa memleketiniń basshysy Kım Chen Yn men respýblıkanyń basqa da jetekshileri jınalǵan alańnan Koreı Halyq áskeri men jumysshy-sharýalar qyzyl gvardııasynyń bólimsheleri, sondaı-aq áskerı tehnıkalar júrip ótti. Zymyran soqqylary men áýe shabýyldaryna qarsy kórinister kórsetildi. Áskerı sherý barysynda tuńǵysh ret Soltústik Koreıada jasap shyǵarylǵan ushqyshsyz ushatyn apparattar halyq nazaryna usynyldy.
Áskerı sherýdi Koreı Halyq áskeriniń bas qolbasshy retinde memleket prezıdenti Kım Chen Yn qabyldady. Merekelik sherýge arnaıy resmı delegasııany bastap QHR tóraǵasynyń orynbasary Lı Iýanchao keldi. Jeńis kúnine arnalǵan saltanatty sharaǵa Qytaıdan bólek, Sırııa, Kýba, Vetnam, Iran, Laos, Úndistan, Indonezııa, Mazambık, Tanzanııa, sondaı-aq basqa da memleketterdiń resmı jáne áskerı delegasııalary qatysty.
Aıdar О́risbaev.
