Qazaqstan Respýblıkasynyń brazılııalyq djıý-djıtsý jáne grepplıng federasııasy jáne birqatar demeýshilerdiń qoldaýymen «Rýhanı jańǵyrý» baǵdarlamasy aıasynda uıymdastyrylǵan aıtýly sharaǵa osy sport túrin serik etken jas órender, Almaty qalasy men oblysy aýmaǵynda ornalasqan Balalar úıiniń tárbıelenýshileri, belgili qoǵam qaıratkerleri men sport fýnksıonerleri jáne bilikti bapkerler men maıtalman mamandar qatysty.
– Bizdiń federasııa qaıyrymdylyq is-sharalardan eshýaqytta tys qalǵan emes. Máselen, Almaty qalasyndaǵy №1 balalar úıinde djıý-djıtsý zalyn ashyp, qajetti quraldarmen jabyqtadyq. Jattyǵý prosessin sapaly júrgizý úshin arnaıy maman taǵaıyndadyq. Qazirgi kezde bir top balalar sol úıirmelerde tegin jattyǵýda. Almatynyń irgesindegi Baǵanashyl aýylynda ornalasqan Balalar úıine de kómektesip turamyz. Sol jerlerde jattyǵatyn ul-qyzdar federasııa esebinen respýblıkalyq jáne jarystarǵa shyǵyp turady. Al búgin demeýshilerdiń qoldaýymen ótken shara barysynda biz 2019 jyldy qorytyndylap, jas órender arasynan úzdikterdi marapattadyq. Sonymen qatar, Balalar úıiniń tárıbelenýshilerine syı-sııapat jasadyq, – deıdi Qazaqstan Respýblıkasynyń brazılııalyq djıý-djıtsý jáne grepplıng federasııasynyń vıse-prezıdenti Aqmaral Qanatbaeva.
