«RF IIM Volgograd oblystyq basqarmasynyń deregi boıynsha 21 jeltoqsan kúni Krasnodardan Qazaqstanǵa baǵyt alǵan avtobýs «KamAZ» júk kóligimen soqtyǵysqan. Avtobýsta 56 jolaýshy bolǵan, onyń tórteýi Qazaqstannyń, ekeýi Tájikstannyń jáne qalǵandary О́zbekstannyń azamaty. Avtobýs Qazaqstanda tirkelgen, sondaı-aq jolaýshylar kóliginiń júrgizýshisi de Qazaqstan azamaty», dedi Aıbek Smadııarov.
Onyń aıtýynsha, jol kólik oqıǵasy saldarynan Qazaqstan azamaty bolyp sanalatyn bir júrgizýshi men eki jolaýshy túrli dene jaraqatyn alyp, Volgogradtyń №25 aýrýhanasyna jetkizilgen.
«Azamattarymyzdyń jaraqaty aýyr emes, ota jasaýdyń qajeti bolmaǵan. Qazaqstannyń Astrahandaǵy konsýldyǵy aýrýhana ákimshiligi jáne polısııamen baılanysta», dedi ol.
