Kongressmender prezıdentke bılikti shekten tys qoldandy jáne Kongress jumysyna kedergi keltirdi degen aıyp taǵýda. Saıasatkerler eki máseleni daýysqa salyp, alǵashqy aıyp boıynsha 230 adam ımpıchmentti qoldap, 197-si qarsy boldy. Kongress jumysyna qatysty aıyppen 229 kongressmen kelisip, 198-i qarsy boldy. О́kilder palatasy bul sheshimdi Senatqa jiberdi. Endigi kezekte sot prosesi bastalady. Munda Kongrestegi ókilder aıyptaýshylar bolsa, senatorlar alqa bıler retinde qatysady. Isti júrgizý AQSh-tyń Joǵarǵy sotyna mindettelgen. Impıchment jarııalanýy úshin senatorlardyń úshten ekisiniń kelisimi kerek, bul shamamen 67 daýysty bildiredi. Osy jerde Kongrestiń joǵarǵy palatasyndaǵy 100 orynnyń 53-i respýblıkashylarǵa tıesili ekenin eskersek, ımpıchmenttiń jarııalanýy ekitalaı. Al demokrattar bul isti sońyna deıin jetkizetinine senimdi. Alaıda AQSh zańyna sáıkes, prezıdenttiń kelesi saılaýǵa qatysýǵa quqy bar.
Kongrestegi demokrattar bul iske jaqsylap daıyndalǵan syńaıly. Olar ótken dúısenbide 658 betten turatyn baıandama daıyndap, taratty. Qujatta prezıdentti para aldy, Ýkraına memleket basshysyn AQSh-tyń burynǵy vıse-prezıdenti Djo Baıdenge qatysty tergeý bastaýǵa úgittedi degen aıyptar kórsetilgen.
Buǵan deıin Kongrestiń Zań komıteti bılikti shekten tys paıdalaný men qurylym jumysyna kedergi keltirý degen tarmaqtarymen kelisken bolatyn. Bul jerdegi bılikke qatysty daý bıyl 25 shildedegi Ýkraına prezıdenti Vladımır Zelenskıımen áńgimesinen týyndap otyr. Donald Tramptyń aıtýynsha, burynǵy vıse-prezıdent Baıdenniń uly Hanter Baıden Ýkraınadaǵy birneshe zań buzýshylyqqa qatysqan. Naqty aıtqanda, prezıdent ony 2014-2019 jyldar arasynda ýkraınalyq Burisma kompanııasynyń dırektorlar keńesiniń quramynda júrip para aldy dep esepteıdi. Buǵan negiz joq emes. О́ıtkeni dál osy kezde Djo Baıden Prezıdent ákimshiliginde Ýkraına boıynsha ákimshilik basshysy bolyp qyzmet atqarǵan-dy. Onyń Ýkraına quqyq qorǵaý qyzmetkerleriniń jumystan bosatylýyna qatysy baryn Kongrestegi respýblıkashylar da aıtyp júrgen.
О́zine taǵylǵan aıyptarmen Donald Tramp kelispeıdi. Prezıdent О́kilder palatasynyń tóraǵasy Nensı Pelosıge hat joldady. Onda taǵylǵan aıyptardyń múmkin emestigin aıtyp, Pelosıdi Amerıka demokratııasyna soǵys ashty dep kinálaıdy.
Joǵaryda aıtyp ótkenimizdeı, AQSh tarıhynda buǵan deıin eki prezıdentke ımpıchment jarııalanǵan. О́kilder palatasy 1868 jyly Endrıý Djonsonǵa, 1998 jyly Bıll Klıntonǵa qatysty is qozǵaǵan. Degenmen, Senat eki prezıdentti de aqtap shyqqan bolatyn. Negizinde prezıdent saılaýy jaqyndaǵan kezde ımpıchment jarııalaý memlekettegi demokrattar úshin de qaýipti. О́ıtkeni Donald Trampty qoldaıtyn aımaqtardyń Kongrestegi demokrattardyń qaıta saılanýyn qıyndatýy múmkin. Mundaı strategııany qoldanýynyń sebebi kóbine áli de túsiniksiz bolyp otyr.
Eldegi jaǵdaıǵa qatysty halyq ta ekige jarylǵandaı. О́tken aptada Washington Post pen ABC júrgizgen saýaldamalarynyń nátıjesin jarııalady. Qatysýshylardyń 49 paıyzy ımpıchmentti qoldap, Tramp bılik basynan ketsin dese, respondentterdiń 46 paıyzy taǵylǵan aıyptarmen kelispeıdi. Djordj Vashıngton ýnıversıtetindegi saıası menedjment baǵdarlamasynyń dırektory, professor Todd Belt óz suhbatynda senatorlardyń kóbi Donald Trampty qoldaıtynyn aıta kele, ımpıchment jarııalanbaıdy dep boljam jasaıdy. Al kongressmen Devıd Skısıllın «Eger prezıdent jaýapkershilikke tartylmasa, Senattaǵy áriptesterim óz mindetterin oryndamasa, onda bul jaǵdaı demokratııamyzǵa qaýip tóngenin bildiredi», dedi.
