«Sıfrly transformasııa: el ekonomıkasynyń ósý núkteleri» – konferensııanyń otyrysyna osy taqyryp arqaý boldy. «Samuryq-Qazyna»UÁQ» AQ basqarma tóraǵasy Ahmetjan Esimovtiń aıtýynsha, qor sıfrly transformasııa baǵdarlamasynyń nátıjesinde naqty jobalardy júzege asyrý arqyly sońǵy eki jylda paıda kólemin 86 mlrd teńgege jetkizbek.
– Bul tek tikeleı paıda. Bıyl 11 aıdyń qorytyndysyna sáıkes qordyń tobyndaǵy kompanııalardyń taza tabysy shamamen 1 trln 150 mlrd teńgeni qurady. Bir jyldyń ishinde Úkimetke túsken dıvıdendter kólemi 2 esege, aqshalaı túrde 5 esege artty, – dedi A.Esimov.
Basqarma tóraǵasy negizgi kórsetkishterdi, onyń ishinde transformasııany júzege asyrý esebinen jaqsartýdy jalǵastyratynyn atap ótti.
2018 jyly jańa top-menedjmenttiń kelýimen 2014 jyly bekitilgen transformasııa baǵdarlamasy qaıta qaralyp, óndiristik bıznes-prosesterdi sıfrlandyrýǵa nazar aýdara otyryp, ózektiligin arttyrdy. Qor jańa IT tehnologııalaryn ázirleý men engizýdi kózdeıtin naqty maqsattarmen sıfrly transformasııaǵa kóshti.
– Biz IT salasyndaǵy jańa jobalar toptamasyn túbegeıli qaıta qaradyq. Aýqymdy IT aýdıt júrgizildi. Nátıjesinde jalpy somasy shamamen 60 mlrd teńgege tıimdilik turǵysynan kúmándi jobalardy iske asyrýǵa arnalǵan shyǵystar ońtaılandyryldy. Bıyl tikeleı paıda 2,5 mlrd teńgeni quraıdy. Qazaqstan temir joly «mobıldi dıagnostıkalyq keshenderdi engizý» jobasyn tabysty júzege asyryp keledi. Nátıjesinde jol dıagnostıkasyn júrgizý jıiligi 12 ese ulǵaıyp, aqaýlardy anyqtaý sapasy 90%-ǵa artady, – dedi A.Esimov.
Basqarma tóraǵasy bul joldyń naqty ahýaly boıynsha jóndeýge kóshýge múmkindik beretinin, sondaı-aq poıyz qozǵalysynyń qaýipsizdigin qamtamasyz etýge aıtarlyqtaı áser etetinin jetkizdi.
