Konsertte mereıtoı ıesimen birge halyqaralyq konkýrstardyń laýreaty Elena Zaremba (Lıýksembýrg), О́zbekstannyń halyq ártisi, Bıbigúl Tólegenova atyndaǵy Halyqaralyq vokalıster konkýrsynyń gran-prı ıegeri Ramız Ýsmanov (О́zbekstan), sondaı- aq Bıbigúl Tólegenova atyndaǵy Halyqaralyq vokalıster konkýrsynyń laýreattary men shákirtteri Abaı atyndaǵy Memlekettik akademııalyq opera jáne balet teatrynyń sımfonııalyq orkestriniń súıemeldeýimen (dırıjeri Erbolat Ahmedıarov) áýelete án salyp, ónersúıer kórermenge erekshe kóńil kúı syılady.
Qazaqtyń bulbuly Bıbigúl Tólegenovanyń 90 jyldyǵyna arnalǵan shyǵarmashylyq keshke Qazaqstan Respýblıkasynyń Mádenıet jáne sport mınıstri Aqtoty Raıymqulova da qatysyp, júrekjardy quttyqtaýyn jetkizdi.
- Osydan týra 19 kún buryn elimizdiń ordasy, Nur-Sultan qalasynda tamasha kesh berdińiz. Mádenıet jáne sport mınıstrligi uıymdastyrǵan «Astana Opera» teatrynda ótken merekelik sharada qazaqstandyq tanymal opera ánshileri, izbasarlaryńyz, Bıbigúl Tólegenova baıqaýynyń laýreattary án shyrqap, mereıińizdi tasytty. Mine, búgingi mereıtoılyq konsertińiz de sondaı joǵary dárejede óterine senimdimin. Árdaıym osylaı abyroı bıiginde bolyńyz, Apaı. Siz asqar shyńǵa shyǵýdyń, shyqqan soń sol bıikte máńgilikke qalýdyń ozyq úlgisin kórsetken birtýar talant ıesisiz! Siz taǵdyr talaıyńyzda san túrli qıyndyqty kórgen, qandaı sátsizdikti bolsyn parasattylyqpen, aqylmen eńsere bilgen kemeńger ańyz Adamsyz. Endi sol beınetińizdiń zeınetin kórip, ortamyzda jón silter, baǵdar berer aqylmanymyz bolyp aman júrińiz,-dedi Aqtoty Raıymqulova.
