Mınıstrdiń aıtýynsha, búginde Qazaqstanda 690 myń múmkindigi shekteýli adam turady. Olardyń 424 myńy eńbekke jaramdy jasta, onyń ishinde 224 myń adam jumysqa qabiletti.
«224 myń múgedektigi bar adamnyń 106 myńy jumys isteıdi. Biz olardyń ekonomıkalyq belsendiligin arttyrý boıynsha sharalar keshenin qabyldaý týraly aldymyzǵa mindet qoıyp otyrmyz, óıtkeni múmkindigi shekteýli jandardy jumysqa almaý máselesi de bar ekeni ras» dedi B. Nurymbetov.
Mınıstr búginde zańnamaǵa sáıkes jergilikti atqarýshy organdar osyndaı azamattar úshin kásiporyndarda kvotalar belgileı alatynyn atap ótti.
«Kvota 2-den 4%-ǵa deıin belgilenedi. Qazirgi tańda olardyń sany 14,5 myń birlikti quraıdy, olar oryndalyp jatqan joq, jumys berýshiler qabyldamaıdy» dedi vedomstvo basshysy.
Múgedektigi bar azamattardy jumyspen qamtý júıesin jetildirý maqsatynda álemdik tájirıbe zerdelendi.
«Túrli elderdiń tásilderi de ártúrli. Máselen, Kanadada, eger kásiporyn kvotany oryndamasa, onda ol memlekettik satyp alýlarǵa qatysa almaıdy. Germanııa men Japonııada múmkindikteri shekteýli jandardy jumysqa alýdan bas tartqan kompanııalar memleketke ótemaqy tóleıdi. Sondyqtan biz bul ıdeıany úlgi retinde aldyq, ony barynsha pysyqtaımyz, tetikterin oılastyramyz: múgedektigi bar adamdy oqytyp, basqa jumysqa ornalastyrý úshin qandaı mólsherde kvota belgileý kerek ekenin qarastyramyz» dedi B. Nurymbetov.
Onyń aıtýynsha, qazir bul másele ázirge ıdeıa deńgeıinde, degenmen, 2020 jyly qabyldanýy tıis zań jobasynyń tujyrymdamasy ázirlendi.
Sonymen qatar mınıstr kelesi jyly erekshe qajettilikteri bar adamdarǵa arnalǵan áleýmettik qyzmetter portaly iske qosylatynyn atap ótti.
«Búgingi tańda múmkindikteri shekteýli jandar ońaltýdyń ártúrli qyzmetteri men taýarlaryn alady. Bul arnaıy áleýmettik qyzmetter, ońaltý quraldary, ymdaý tiliniń mamandary, jeke kómekshiler jáne shıpajaılyq-kýrorttyq emdeý. Qazir munyń bári memlekettik satyp alý arqyly júzege asyrylady, bul qyzmet kórsetý men taýarlardy usyný merzimin asa uzaqqa sozyp jiberedi» dedi mınıstr.
Jańa portaldyń máni mynada — endi múgedektigi bar adam jetkizýshini ózi tańdaı alady.
«Biz memlekettik satyp alý júıesinen shyǵamyz, bul aqparattyq ınternet alań bolady, onda bir jaǵynan barlyq taýarlar men qyzmetterdi jetkizýshiler bolady, al ekinshi jaǵynan múmkindikteri shekteýli jandardyń ózderi bolady» dep túıindedi mınıstr.
