Alańnyń ashylý saltanatynda grek-rım kúresinen Máskeýde ótken Olımpıada oıyndarynyń jeńimpazy, Álem chempıony, Qazaq KSR Eńbek sińirgen jattyqtyrýshysy Jaqsylyq Úshkempirov oblys sportynyń búginge deıin jetken jetistikteriniń az emes ekenin aıryqsha atap ótip, atalǵan nysannyń ashylýymen kópshilikti quttyqtady. Sonymen qatar Jambyl oblysy ákiminiń birinshi orynbasary Bekbolat Orynbekov atalǵan salany damytýda óńirde kóptegen jumystardyń atqarylyp jatqanyn aıtyp ótti. Aǵymdaǵy jyldyń ózinde óńirde 40 sport nysany paıdalanýǵa berilgen. Kelesi jyly taǵy 92 nysan el ıgiligine beriletin bolady. Sonymen qatar, oblysta qazyna qarjysy esebinen 2 jáne demeýshiler esebinen 1 sport kesheni salynýda. Jyl basynan beri halyqaralyq deńgeıdegi baıraqty básekelerde el namysyn qorǵaǵan 14 sportshy júldeli orynǵa ıe bolǵan. Sonymen qatar, atalǵan jıynda alańǵa esimi jazylǵan birqatar sportshylarǵa arnaıy kýálikter tabystaldy.
Ashylyp otyrǵan «Dańqty sportshylar alańynyń» ortasynda bıiktigi 6,5 metrdi quraıtyn fakel ornalasqan. Onyń eki shetinde travertın jáne granıt materıalynan daıyndalǵan, bıiktigi 3 metr, uzyndyǵy 9 metr bolatyn 2 qurmet taqtasy qoıylǵan. Qurmet taqtasynda Jambyl óńirinen shyqqan dańqty 145 sportshynyń jáne 96 eńbegi sińgen jattyqtyrýshynyń esimi jazylǵan. Olardyń ishinde Jaqsylyq Úshkempirov, Bolat Jumadilov, Ermahan Ybyraıymov, Baqtııar Artaev, Beıbit Ystybaev, Aqjúrek Tańatarov, Eldos Smetov syndy sport sańlaqtary bar.
