Jańatas qalasynda Úkimet basshysy Asqar Mamınniń qatysýymen elimizdiń Indýstrııa jáne ınfraqurylymdyq damý mınıstrligi, Jambyl oblysynyń ákimdigi jáne «EýroHım MHK» AQ arasynda mıneraldy tyńaıtqyshtardy shyǵarý zaýytyn salý jáne paıdalaný jónindegi Memorandýmǵa qol qoıyldy. Jobaǵa tartylǵan ınvestısııalar kólemi shamamen 1 mıllıard AQSh dollaryn quraıdy. «EýroHım» álemdegi jetekshi mıneraldy tyńaıtqyshtardy óndirýshi kásiporynnyń biri. Sonymen qatar, zaýyttyń qýattylyǵy jylyna 1 mıllıon tonna tyńaıtqysh óndirýge jetedi. Jańatas qalasynda «EýroHım Qarataý» jaýapkershiligi shekteýli seriktestigi ornalasqan. Resýrstyq bazasy Qarataý fosforly basseıniniń ken orny bolady. О́ndiris tehnologııasy qorshaǵan ortaǵa zııanyn meılinshe az tıgizip, joǵary sapaly fosforly jáne keshendi tyńaıtqyshtardy fosfogıps qaldyqtarynsyz shyǵarýǵa múmkindik beredi.
Bir mezette jylyna 120 myń tonnaǵa jýyq kalsıı hlorıdi men keminde 400 myń tonna dıgıdrat gıpsi óndiriletin bolady. Bul avtojol, munaı-gaz óndirý, qurylys jáne aýyl sharýashylyǵy salalarynyń qajettilikterin óteıdi. Atalǵan kásiporyn 2021 jyly paıdalanýǵa beriletin bolady. Munda 2000-ǵa jýyq jańa jumys qurylady dep josparlanǵan. Budan keıin Premer-Mınıstr Asqar Mamın «Jańatas jel elektr stansııasy» qurylysynyń jobasymen tanysty. Atalǵan jobanyń quny 50 mıllıard teńge bolady. Sondaı-aq, jobanyń birinshi kezeńiniń qýattylyǵy 100 MVt bolsa, ekinshi kezeń 200 MVt-ty quraıdy. Búgingi tańda munda 19 jel generatory ornatylǵan bolsa, 2020 jyldyń birinshi toqsanynda olar 40 generatorǵa deıin jetkiziletin bolady.
Úkimet basshysyna 2020-2022 jyldary salynatyn «Qazaqsoda» jaýapkershiligi shekteýli seriktestiginiń kalsıılendirilgen soda óndiretin zaýyt qurylysyna daıyndyq barysy týraly baıandaldy. «Yildirim Group» túrik kompanııasynyń atalmysh jobaǵa salatyn ınvestısııalar kólemi 127 mıllıardqa jýyq teńgeni quraıdy. Atalǵan kásiporyn birinshi kezeńde jylyna 400 myń tonna ónim shyǵaratyn bolady. Perspektıvada óndiris kólemin jylyna 1 mıllıon tonnaǵa deıin arttyrý josparlanǵan.
«Jambyl oblysyna jumys sapary barysynda Asqar Mamın Taraz qalasyndaǵy óńirdiń jetekshi ári kóne kásiporyndarynyń biri – «Qazfosfat» jaýapkershiligi shekteýli seriktestiginiń Mıneraldy tyńaıtqyshtar zaýytyn aralap kórdi. Jyl basynan beri zaýyt 142 mıllıard teńgeniń ónimin shyǵarǵan. Sonymen qatar, bul ónimder negizinen ishki naryqqa shyǵarylǵan jáne Reseı, Qytaı, AQSh, Germanııa, Birikken Arab Ámirligi elderine inishara eksporttalǵan. Budan keıin Úkimet basshysy qosymsha 70 jańa jumys ornyn ashýǵa múmkindik beretin «Sáýle» kondıterlik fabrıkasynyń úshinshi óndiristik jelisin iske qosýǵa qatysty. Sonymen qatar, Premer-Mınıstr Jambyl oblysynyń 80 jyldyǵyna oraı Taraz qalasynyń ortalyǵynan ashylǵan «Kóne Taraz» tarıhı-etnomádenı kesheninde boldy. Keshen qurylysymen tanysyp, keshen ishinen jańa ashylǵan oblystyq tarıhı-ólketaný mýzeıine bardy.
Aǵymdaǵy jyldyń 11 aıynda Jambyl oblysynda óńdeý ónerkásibiniń kólemi 319,5 mıllıard teńgeni, negizgi kapıtalǵa salynǵan ınvestısııa kólemi 250,1 mıllıard teńgeni quraǵan. Sonymen qatar, 2020 jyldan 2025 jylǵa deıingi kezeńde iske asyrý merzimderimen jáne 11 myńnan astam jańa jumys oryndaryn qurýmen 2,7 trıllıon teńgege 66 ınvestısııalyq jobanyń pýly quryldy.
Jambyl oblysy
