Mańǵystaý oblysy Polısııa Departamentiniń jergilikti polısııa qyzmetiniń basshysy Madııar Omarovtyń málimetine súıensek, oblys aýmaǵynda jol kólik oqıǵalarynyń 17,7%-ǵa tómendeýi baıqalýda (2018 jyldyń 12 aıynda – 320, 2019 jyldyń 11 aıynda – 273), sondaı-aq, dene jaraqatyn alǵan adamdardyń sany 3,5% (404-ten 390-ǵa) jáne qaza bolǵandardyń sany 13,3% (83-ten 72-ke) azaıǵan.
Osy jyly jyldamdyq rejımin buzý jáne qarsy qozǵalys jolaǵyna shyǵýǵa qatysty 40 fakti, jaıaý júrginshilerge qozǵalys kezinde artyqshylyq bermeýge qatysty 174 fakti, mas kúıinde kólik quralyn basqarýǵa qatysty 15 fakti, úı janýarlaryna qaqtyǵysýymen bolǵan 25 fakti tirkelgen.
-Jol qozǵalysy qaýipsizdigine birqatar faktorlar áser etedi, onyń ishinde avtoparktiń ósýi, joldardyń jaǵdaıy, eldi mekender joldarynyń jaryq shamdarymen tolyq qamtamasyz etilmeýi, kóliktegi quqyq buzýshylyqtardy aldyn alýdyń álsizdigi. Osy jáne ózge de máselelerdi sheshý maqsatynda jergilikti atqarýshy jáne ýákiletti memlekettik organdarǵa osy baǵyttaǵy jumystardy jandandyrý jáne qajetti sharalar qabyldaý jóninde usynystar berildi, dedi Mańǵystaý oblysy prokýrorynyń orynbasary Erjan Turmaǵambetov.
Eske sala keteıik, qarasha aıyndaǵy Májilis otyrysynda Bas prokýratýranyń IIM-men birlese zań jobasy birinshi oqylymda maquldanǵan bolatyn. Qujatqa sáıkes, mas kúıinde kólik júrgizgeni úshin kólik júrgizý quqyǵynan ómir boıyna aıyrylýy múmkin.
