«Almaty oblysyndaǵy ushaq apaty barlyq qazaqstandyqtar úshin asa qaıǵyly habar boldy. О́kinishke oraı, adamdar qaza tapty, zardap shekkender kóp» dedi A. Mamın.
Úkimet basshysy qaza tapqandardyń týǵan-týystary men jaqyndaryna kóńil aıtty, al zardap shekkenderge tezirek saýyǵýdy tiledi.
Memleket basshysy Qasym-Jomart Toqaevtyń tapsyrmasy boıynsha qurylǵan Úkimettik komıssııa jumysynyń aldyn ala nátıjeleri týraly Premer-Mınıstrdiń orynbasary R. Sklıar, sotqa deıingi tergeý amaldary jáne oqıǵa ornynda júrgizilip jatqan jumystar týraly ishki ister mınıstri E. Turǵymbaev, zardap shekkenderdiń jaǵdaıy týraly densaýlyq saqtaý mınıstri E. Birtanov baıandady.
A.j. 27 jeltoqsanda tańǵy saǵat 07:21-de «Bek Air» áýe kompanııasynyń №Z2100 reısi, «Almaty – Nur-Sultan» baǵyty boıynsha ushyp shyqqan Fokker-100 ushaǵy áýege kóterilý kezinde tómen quldılap, beton qorshaýdy buzyp ótken. Almaty qalasynyń Qazaeronavıgasııa baıandamasy boıynsha, saǵat 07:22-de ushaqtyń áýege kóterilýi kezinde dıspetcherler ushqyndardy baıqaǵan. Radar ekranynan ushaq belgisi joǵalyp ketken. Dabyl qaǵylǵan.
Saǵat 08:04-te Almaty qalasynyń Tótenshe jaǵdaılar departamenti ushý jolaǵynan 1,8 shaqyrym qashyqtyqtaǵy Almaty oblysy Talǵar aýdany Gúldala aýylynyń shetinde ashyq aýmaqta Fokker-100 ushaǵynyń qulaǵanyn anyqtady.
Ushaq Almatydan ushqan kezde áýe kemesiniń bortynda 98 adam bolǵan, onyń ishinde 9-y – bala jáne 5-eýi – ekıpaj músheleri.
Saǵat 15:00-degi jaǵdaı boıynsha oqıǵa saldarynan barlyǵy 12 adam qaza tapqan, Almaty qalasynyń túrli medısınalyq mekemelerine 53 adam jetkizilgen, onyń ishinde 8 adamnyń jaǵdaıy asa aýyr dep baǵalanýda.
Nur-Sultan qalasynan sanıtarlyq avıasııa bortymen jetekshi respýblıkalyq medısınalyq ortalyqtardyń mamandary ushyp bardy, onyń ishinde Ulttyq neırohırýrgııa ortalyǵynyń jáne Travmatologııa jáne ortopedııa ǴZI mamandary bar.
Almaty qalasy men Almaty oblysynyń medısınalyq uıymdary qajetti medısınalyq kómekti kórsetip jatyr, dári-dármekpen jáne qajetti qanmen tolyq qamtamasyz etilgen. Zardap shekkendermen jáne qaza tapqandardyń otbasylarymen psıhologtar jumys isteýde.
«Memleket basshysynyń tapsyrmasymen ushaq apatynan qaza tapqandardyń otbasylaryna 4 mln teńgeden qarajat bólinedi. Sonymen qatar barlyq zardap shekkenderge qajetti qarjylaı kómek kórsetiledi» dedi A. Mamın.
Premer-Mınıstr Ishki ister mınıstrligine «Bek Air» áýe kompanııasynyń ushaǵynyń qulaýyna baılanysty tolyq sotqa deıingi tergeý jumystaryn júrgizýdi, Densaýlyq saqtaý mınıstrligine zardap shekkenderdiń tezirek saýyǵyp shyǵýy úshin barlyq sharalardy qabyldaýdy tapsyrdy.
«Apat sebepterin tergeý jónindegi Úkimettik komıssııa 2020 jyldyń 10 qańtaryna qaraı óz jumystarynyń aldyn ala qorytyndylaryn usynýy tıis» dep naqtylady A. Mamın.
