Qoǵamdyq qabyldaý qyzmetiniń maqsaty – «bir tereze» ustanymy boıynsha oblystyń jergilikti atqarýshy organdaryna júginýge qolaıly jaǵdaı jasaý, memlekettik organdardyń qyzmetine qatysty aqparattardy usynýdyń qoljetimdiligi men sapasyn arttyrý.
Memleket basshysy bekitken «Halyq únine qulaq asatyn memleket» tujyrymdamasyn iske asyrý maqsatynda agenttik tóraǵasy Alık Shpekbaev pen oblys ákimi Danıal Ahmetov atalǵan qoǵamdyq qabyldaý alańynda azamattardy jeke máseleleri boıynsha qabyldady.
Sondaı-aq «Shyǵys – adaldyq alańy» jobalyq keńsesiniń jáne «Bıznes pen ınvestısııany qorǵaý» jobasynyń birlesken qyzmeti aıasynda Alık Shpekbaev oblystyq jedel basqarý, aqparattyq tehnologııalar jáne «INVEST IN EAST» ınvestısııalyq keńsesiniń ortalyqtarymen tanysty.
A.Shpekbaev pen D.Ahmetov D.Serikbaev atyndaǵy ShQMTÝ-de ótken «Parasatty urpaq» atty sybaılas jemqorlyqqa qarsy stýdenttik forýmǵa qatysty. Forýmda qazaqsha kúresten Qazaqstannyń eńbek sińirgen sport sheberi, «Álem barysy», «Qazaqstan barysy» Aıbek Nuǵymarov, álem chempıony, Olımpıadanyń qola júldegeri Iýlııa Galysheva, Shákárim atyndaǵy Semeı memlekettik ýnıversıtetiniń rektory Meıir Eskendirov, «Sanaly urpaq» belsendileri sóz sóıledi.
Forýmdy qorytyndylaı kele agenttik tóraǵasy Qazaqstan jastary sybaılas jemqorlyqqa qarsy is-qımyl jasaýǵa daıyn eń belsendi jáne nátıjeli top ekendigin atap ótti. Sonymen qosa jastardy sybaılas jemqorlyqqa qarsy tárbıeleýde otbasy ınstıtýtynyń róli zor ekenine nazar aýdardy.
Forým sońynda A.Shpekbaev «Shyǵys – adaldyq alańy» jobasy aıasynda Shyǵys Qazaqstan gýmanıtarlyq kolledjine bardy. Bilim berý mekemelerindegi parasattylyq mektepteriniń maqsaty – óskeleń urpaqqa rýhanı qundylyqtar men joǵary adamgershilik qasıetterdi, sybaılas jemqorlyqqa qarsy mádenıetti qalyptastyrý.
