Elorda ákimi Altaı Kólginov qala turǵyndaryn jańa qonystarymen jáne kele jatqan Jańa jyl merekesimen quttyqtady.
«Qýanarlyq jaıt. Elbasy Nursultan Ábishuly Nazarbaev bekitken «Nurly Jer» memlekettik qoljetimdi turǵyn úı baǵdarlamasynyń arqasynda siz kópten kútken páterlerge ıe bolyp otyrsyzdar. Turǵyn úı kesheniniń ornalasqan jeri jaqsy, sol jaǵalaýda. Qonystaryńyz qutty bolsyn, Jańa jyldy jańa páterde qarsy alasyzdar! 2020 jyldyń birinshi jartyjyldyǵynynan bastap turǵyn úı kesheniniń birinshi qabatynda emhana, balalarǵa arnalǵan shaǵyn ortalyqtar, «Kásipker ana» ortalyǵy, polısııa pýnkti ońaltý ortalyqtary jumys isteıdi. Osy jyly qala turǵyndaryna 3,5 myń páter berildi. Prezıdent Qasym-Jomart Kemeluly Toqaevtyń tapsyrmasyna sáıkes kelesi jyldan bastap qoljetimdi turǵyn úı qurylysy kólemin 3 esege arttyramyz» dedi Altaı Kólginov.
«Qazaqstannyń turǵyn úı qurylys jınaq banki» AQ Basqarma tóraǵasy Lázzat Ibragımova atap ótkendeı, osy jyly 10,5 myńnan astam elorda turǵyndary páter aldy. Nur-Sultan qalasynda barlyǵy 208 myńnan astam bank salymshylary bar. Turǵyn úı qurylys jınaq banki klıentterine 3,5% - dan 5% - ǵa deıin turǵyn úı satyp alýǵa nesıe beredi. 2019 jyly Nur-Sultan qalasynyń 9,5 myńnan astam turǵyny turǵyn úı satyp alýǵa nesıe aldy, 51 myń turǵyn depozıt ashty.
