Turǵyn úı kesheniniń ashylýyna úleskerlerden bólek Nur-Sultan qalasy ákiminiń orynbasary Altynbek Qaısaǵalıev qatysty.
«Jańa jyl qarsańynda kópten beri armandap kútken páterlerińizge qol jetkizgenderińiz biz úshin úlken qýanysh. Osydan jeti jyl buryn qurylysy bastalǵan turǵyn úı keshenine 200-den astam otbasy qarjy salǵan. Tuńǵysh Prezıdent – Elbasy Nursultan Nazarbaev pen Memleket basshysy Qasym-Jomart Toqaevtyń qoldaýymen jáne Úkimet basshysynyń jetekshiligimen arnaıy qarajat bólinip, sonyń nátıjesinde bul úıdiń qurylysy aıaqtaldy. Qurylys barysynda aıtarlyqtaı qıyndyqtar bolǵany ras. Deı turǵanmen «Elorda qurylys kompanııasynyń», qurylys kooperatıviniń basshysy Gúlnár Qasymovanyń atqarǵan júıeli jumysynyń nátıjesin búgin kórip otyrmyz» dedi Altynbek Qaısaǵalıev.
Osydan keıin saltanatty túrde turǵyn úı kesheniniń kilti tabys etildi. Buǵan qosa Altynbek Qaısaǵalıev «Nurly jer» baǵdarlamasyna qatysyp, «Komfort De Luxe» turǵyn úı kesheniniń aıaqtalýyna tikeleı sebepker bolǵan kompanııa basshylaryna qala ákiminiń alǵys hatyn tabystady.
Saltanatty jıynda sóz alǵan qurylys kooperatıviniń basshysy Gúlnár Qasymova qala ákiminiń qurylys barysyn árdaıym baqylaýda ustaǵanyn atap ótti.
«Turǵyn úı kesheniniń syrtqy jelisinde úlken qıyndyqtar bolatyn. Biraq qala ákimi problemaǵa aınalǵan úıimizdi óz baqylaýynda ustasa, orynbasary Altynbek Keńesuly aptasyna eki-úsh márte kelip tekserip júrdi. Nur-Sultan qalasynyń ákimdigine úleskerler atynan alǵysymyzdy bildiremiz» dedi qurylys kooperatıviniń basshysy.
Jıyn barysynda jańadan qonys toıyn toılaǵaly otyrǵan Dámeli Ábdihalyqova «Komfort De Luxe» turǵyn úı kesheniniń úlken qıyndyqtarmen salynǵanyn qozǵap ótti. Ol aıyna keminde eki retten kelip, kez kelgen problemany sheship otyrǵan qala basshysy Altaı Kólginovke erekshe alǵysyn bildirdi.
«Biz 2012 jyly «Azbýka jılıa» kompanııasyna» aqshamyzdy salǵannan keıin 2013 jańa úıimizge kóshýimiz kerek bolatyn. О́kinishke oraı, kompanııa basshylary óz mindetterin oryndamaı, qaltalaryna aqsha túsken soń shetel asyp qashyp ketti. Sodan elorda ákimdigine shaǵymdanyp barǵanymyzda qala basshylyǵy turǵyn úı keshenin «Orda ınjınerıng» uıymyna tapsyrdy. Biraq bul kompanııa sotpen jeńip alǵan aktıvterimizdi satyp, qurylysty aıaqtamaı ketti. Kóp uzamaı memleket tarapynan «Nurly jer» baǵdarlamasy jarııalanyp, sonyń aıasynda problemaly úıimiz «Elorda qurylys kompanııasyna» bekitildi. Tender jarııalanyp, baspanamyzdy «Merkýrıı jáne K» uıymy aıaqtady. Bizdiń jaǵdaıymyzdy nazardan tys qaldyrmaǵan Prezıdentimizge, Nur-Sultan qalasynyń ákimdigine alǵysymyz sheksiz» dedi jańa baspananyń ıesi.
Aıta keteıik, «Komfort De Lıýks» turǵyn úı kesheni elordanyń Shubary shaǵyn aýdanyndaǵy Qalqaman jáne Narkesken kósheleriniń qıylysynda ornalasqan. Ol óz mindetin tolyq aıaqtamaǵan qurylysshylardyń kesirinen 2015 jyly problemaly turǵyn úılerdiń qataryna engizilgen bolatyn. 2018 jyly Nur-Sultan qalasy ákimdiginiń janyndaǵy turǵyn úı qurylysyna úlestik qatysý máseleleri jónindegi vedomstvoaralyq komıssııa «Nurly jer» baǵdarlamasy aıasynda qurylysty aıaqtaý úshin «Elorda qurylys kompanııasy» JShS ýákiletti uıymyna usynylǵan. Keshen 3 kireberisten, 20 qabattan turady.
