Qazirgi tańda Memlekettik qyzmet isteri agenttigi óz quzyreti sheńberinde jastarǵa baılanysty is-sharalardy jalǵastyrýda. Agenttiktiń Batys Qazaqstan oblysy boıynsha departamenti Prezıdent janyndaǵy Memlekettik basqarý akademııasynyń Batys Qazaqstan oblystyq fılıalymen birlesip, daryndy jastardy memlekettik qyzmetke tartý, kadr qoryn qalyptastyrý maqsatynda 2018 jyly oblysymyzda alǵash ret joǵary oqý oryndary túlekteri úshin Batys Qazaqstan oblysynyń «Jańa talap» memlekettik qyzmet mektebi qurylyp, óz jumysyn jalǵastyryp keledi.
О́tken jyly «Jańa talap» memlekettik qyzmet mektebiniń quramyna motıvasııalyq esse jazyp, testileý men áńgimelesýden keıin joǵary oqý oryndarynyń 33 stýdenti qabyldandy. Mekteptiń 14 tyńdaýshysyna memlekettik organdarda taǵylymdamadan ótý múmkindigi qamtamasyz etildi.
Osy jyly mektep baǵdarlamasyn jańa formatta júrgizý uıymdastyryldy, ár joǵary oqý oryndarynda toptar qurylyp, mektep quramyna jastar praktıkasy aıasynda memlekettik organdarda tájirıbeden ótip júrgen mamandar da engizildi. Mektepke qujattaryn tapsyrǵan M.О́temisov atyndaǵy Batys Qazaqstan memlekettik ýnıversıtetiniń, Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń, Qazaqstan ınnovasııalyq jáne telekommýnıkasııalyq júıeler ýnıversıtetiniń jáne Batys Qazaqstan ınnovasııalyq-tehnologııalyq ýnıversıtetiniń 105 stýdentiniń 80%-y mektepke qabyldandy.
Memlekettik qyzmetke ornalasýǵa úmitkerler aldymen memlekettik til men zańnamalardy bilýge arnalǵan testileýden ótip, konkýrstyq negizde memlekettik ákimshilik laýazymǵa ornalasa alady. Osy rette memlekettik qyzmet mektebiniń tyńdaýshylaryn testileý baǵdarlamasyna engizilgen normatıvtik-quqyqtyq aktilermen tanystyrý maqsatynda Memlekettik qyzmet isteri agenttigi Batys Qazaqstan oblysy boıynsha departamentiniń basshylyǵymen jáne quzyretti memlekettik organdardyń bilikti mamandarymen dárister, sondaı-aq memlekettik kórsetiletin qyzmetter salasyndaǵy ýákiletti organ retinde «Azamattarǵa arnalǵan úkimet» memlekettik korporasııasy» KEAQ Batys Qazaqstan oblysy boıynsha fılıalynyń ókili áleýmettik jeliler arqyly jáne mgov, egov mobil qosymshalary arqyly elektrondyq qyzmetterdi alý boıynsha praktıkalyq dáris uıymdastyryldy.
Sonymen qatar mektep tyńdaýshylaryna Prezıdent janyndaǵy Memlekettik basqarý akademııasynyń Batys Qazaqstan oblysy boıynsha fılıalynyń dırektory jáne mamandarmen jeke tulǵalyq jáne kásibı quzyretterdi qalyptastyrý maqsatynda «Jeke tulǵanyń damý paradıgmasy», komandada jumys isteýge úırenýge múmkindik berý, joldastyq ahýaldy qalyptastyrý jáne qarym-qatynas jasaý úshin psıhologııalyq kedergilerdi joıýǵa daǵdylaný boıynsha «Yntymaqtastyq, komanda qurý», «Kommýnıkatıvti daǵdylar» taqyryptarynda trenıng ótkizildi.
Memlekettik qyzmetshilerdiń boıynda kásibı biliktiligimen qatar, qarym-qatynas jasaý qabileti, ádeptilik, kommýnıkatıvtilik jáne sóıleý mádenıeti sııaqty jeke qasıetteri bolýy qajet. Sóıleý mádenıetin qalyptastyrý, kópshilik aldynda sóıleý daǵdylaryn damytý maqsatynda jáne telearna áleminiń ishki jumysymen, baǵdarlamalardy túsirý, jazý barysymen tanysý úshin departamenttiń bastamasymen mektep tyńdaýshylaryna «AQJAIYQ», «TDK-42» telearnalarynda ekskýrsııa uıymdastyryldy.
Mektep tyńdaýshylaryna áleýmettik jelilerde aqparattardy ilgeriletý boıynsha «Áleýmettik jelilerdi paıdalaný jáne daǵdylaryn jetildirý» boıynsha da trenıng uıymdastyrylyp, «Qalam» oqý ortalyǵynyń dırektory óz tájirıbesimen bólisti. Aldaǵy ýaqytta mektep tyńdaýshylary osy alǵan bilimderin tájirıbe júzinde memlekettik organdarda taǵylymdamada paıdalanatyn bolady.
Memlekettik qyzmet mektebi jas kóshbasshylarǵa memlekettik qyzmettiń is júzindegi daǵdylaryn úırenýge múmkindik beredi. Qazirgi tańda mekteptiń 30-ǵa jýyq tyńdaýshysy oblystaǵy jergilikti atqarýshy organdarda, sot júıesinde, quqyq qorǵaý organdarynda, sonymen qatar Atyraý, Mańǵystaý oblystarynynyń memlekettik organdarynda taǵylymdamadan ótýge qyzyǵýshylyq tanytýda.
Taǵylymdamadan ótken soń «Jańa talap» memlekettik qyzmet mektebiniń tyńdaýshylaryna oqý kýrstaryn aıaqtaǵany týraly sertıfıkat beriledi.
Bolashaq kóshbasshylarmen pikirlesý barysynda biri memlekettik qyzmette qyzmet atqaryp, eline adal qyzmet etýdi josparlasa, endi biri aýyldy damytýǵa septigimdi tıgizsem deıdi. Osy rette atalǵan joba «Jańa talap» mektep túlekterine bolashaqta bıik belesterdi baǵyndyryp, tek zań aıasynda jáne el múddesine adal qyzmet etýine múmkindik beredi degen úmittemiz.
Ǵalym TURSYNBAEV,
Memlekettik qyzmet isteri agenttigi Batys Qazaqstan oblysy boıynsha departamentiniń basshysy
