Búgin osy sharaǵa baılanysty Almatydaǵy Dostyq úıinde baspasóz-máslıhaty uıymdastyryldy. Oǵan Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary general-maıor Muhametqalı Satov, Ishki ister organdary men Ulttyq ulan ardagerleri keńesiniń tóraǵasy mılısııa general-maıory О́mirzaq Bolsambekov, Ulttyq ulan «Ońtústik» óńirlik qolbasshylyǵynyń qolbasshysy general-maıor Talapker Ámrıev, «General Panfılov qorynyń» quryltaıshysy, dańqty dıvızııa komandıriniń nemeresi Alýa Baıqadamova qatysty.
Jıyndy ashqan Muhametqalı Satov: «Qazaqstandyqtar Uly Otan soǵysynyń basynan aıaǵyna deıin maıdannyń alǵy shebinde boldy. Surapyl bastalǵanda Brest qamalyn myńnan asa jerlesterimiz qorǵasa, jeńis kúni Georgıı Býlatovpen birge Raqymjan Qoshqarbaev Reıhstagtyń tóbesine tý tikti. Respýblıkamyzdyń 1 mıllıon 200 myńnan asa turǵyny soǵysqa qatysyp, sol sarbazdardyń teń jartysyn astamy qan maıdannan oralmady. Asqan erligi úshin 528 jaýyngerge Keńes Odaǵynyń batyry ataǵy berilse, bul ataq Talǵat Bıgeldınov, Leonıd Beda, Ivan Pavlov jáne Sergeı Lýganskııge eki retten buıyrdy. Pýlemetshi Mánshúk Mámetova, mergen Álııa Moldaǵulova, ushqysh Hıýaz Dospanova syndy arýlarymyzdyń da erligin keıingi urpaq ańyz qylyp aıtýda. Qasıetti elimiz ben jerimizdi basqynshylardan qorǵap, keleshek urpaqqa beıbit ómirdi amanat etý úshin ata-apalarymyz, aǵa-tátelerimiz jaý áskerimen aıanbaı aıqasty. Odan bólek, Qazaqstan halqynyń tyldaǵy erligin de erekshe atap ótýge tıispiz. Soǵys oty órship turǵan jyldary eńkeıgen qarttan eńbektegen balaǵa deıin tańnyń atysynan kúnniń batysyna deıin qara jumysqa jegildi. Olardyń da Uly Jeńiske ózderiniń ólsheýsiz úlesterin qosty. Bunyń barlyǵy da búgingi urpaqtyń jadynda», – dep tebirene sóıledi.
Sol sekildi aıtýly jıynǵa qatysýshy ardagerler Uly Otan soǵysy kezindegi qazaqstandyq jaýyngerlerdiń kózsiz erligi jáne tyl eńbekkerleriniń eren eńbegi jaıynda baıandaı kele, osy taqyrypqa baılanysty birqatar qyzyqty derekterdi alǵa tartty.
Al estafetanyń ózine keler bolsaq, onyń maqsaty – Uly Otan soǵysynda Otanyn janqııarlyqpen qorǵaǵan qazaqstandyq jaýyngerlerdiń erligine qurmet kórsetý; esimderin el esinde saqtaý; maıdan dalasynda qaza tapqan ár soldattyń erligine bas ııý; jastardyń, ishki ister organdary qyzmetkerleri men Ulttyq ulan áskerı qyzmetshileriniń boıyna otansúıgishtik qundylyqtardy sińirip, patrıotızmge tárbıeleý; áskerı boryshtaryn úlgili atqarýǵa yqpal etý; Qazaqstan halqynyń batyrlyq tarıhyna qurmetpen qaraý.
Osylaısha, Uly Otan soǵysyndaǵy jeńistiń 75 jyldyǵyna arnalǵan «Biz – Jeńistiń muragerimiz!» atty estafetasy bastaldy.
