Múlik veb-portal arqyly resimdelmek
Qujat ázirleýde bıýrokratııa men qaǵazbastylyqtan halyqtyń mezi bolǵany belgili. Sondyqtan, eldegi tıisti mekemeler qyzmetiniń móldirligin arttyryp, júıedegi jemqorlyqtyń jolyn kesý sharalary qolǵa alynýda.
Múlik veb-portal arqyly resimdelmek
Qujat ázirleýde bıýrokratııa men qaǵazbastylyqtan halyqtyń mezi bolǵany belgili. Sondyqtan, eldegi tıisti mekemeler qyzmetiniń móldirligin arttyryp, júıedegi jemqorlyqtyń jolyn kesý sharalary qolǵa alynýda.
Osydan 9 jyl buryn elimizde elektrondy úkimet qurý isi bastaldy. Soǵan oraı jasalǵan baǵdarlamanyń basty maqsaty aqparattyq-kommýnıkasııalyq tehnologııa arqyly halyqqa sapaly ári jedel qyzmet kórsetý bolatyn. Negizi, elektrondy úkimet engizý – bul memlekettik basqarýdyń tıimdiligin arttyrýdy kózdeıtin ákimshilik reformanyń mańyzdy elementi. Ol memlekettik prosedýralardyń móldirligin qamtamasyz etip, sybaılas jemqorlyqty tómendetýge múmkindik týdyrady. Ekinshi, memlekettik apparatty ustaý boıynsha shyǵyndardy qysqartady. Qyzmetkerlerdiń áleýmettik jaǵdaıyn da túzeıdi. Úshinshiden, qyzmetiniń kásibıligi men qyzmet kórsetýdi jaqsartady. Tórtinshiden, salyqtardy tóleý men ártúrli qujattardy resimdeý prosedýralaryna kóp ýaqyt ketirmeıdi, dedi «Astana qalasy boıynsha jyljymaıtyn múlik ortalyǵy» RMQK dırektorynyń orynbasary Baıtaq Ádephanuly.
Búginge deıin «Elektrondy úkimet» qalyptasý men damýdyń tórt kezeńinen ótti. Birinshi, «Elektrondy úkimet» portaly iske qosylyp, aqparattarmen tolyqtyryldy. Ekinshi, ınteraktıvti kezeńde elektrondy qyzmetter usynyldy. Kezekke turmaı-aq kez kelgen organǵa suranys jiberip, qajetti qujat taýyp alatyn múmkindik týdy. Úshinshi, tranzaksııalyq kezeńde salyq pen aıyppuldy, kommýnaldyq qyzmet aqysyn onlaın júıesinde tóleýge jaǵdaı jasaldy. Ásirese, kásipkerler úshin onyń paıdasy zor boldy. Elektrondy memlekettik satyp alýlar arqyly tenderler men baıqaýlardyń ádildigi men ashyqtyǵy aıqyndaldy. Tórtinshi, túrlendirmeli mezet. Munyń basty maqsaty, halyqqa qyzmet kórsetýdi meılinshe jyldamdatý. Áleýmettik mańyzy bar qyzmetterge kóńil bólinip, barlyǵy elektrondy úlgige aýystyryldy. Osyǵan oraı, ortalyq «E-gov» buryshyn uıymdastyryp, ǵalamtorǵa kirý úshin bólingen VPN baılanys arnasyn iske qosty. Sóıtip, azamattarǵa tehnıkalyq tólqujatty portal arqyly alýdy túsindirdi.
Kólik jáne kommýnıkasııa men Ádilet mınıstrligi Astana jáne Almaty qalalarynda jyljymaıtyn múlik nysandarynyń tehnıkalyq tólqujattary men onyń kóshirmesin berýdi «Elektrondy úkimet» veb-portaly arqyly uıymdastyrýdy qolǵa aldy. Qanatqaqty rejimde úsh aıǵa ulasqan shara óz nátıjesin berdi. Atalǵan mekeme «Halyqqa qyzmet kórsetý ortalyǵy» RMK, «Ulttyq aqparattyq tehnologııalar» AQ-pen birge tehnıkalyq tólqujat berýdi portal arqyly elektrondy júıemen resimdeýdi bastady. Alǵashynda túrli qıyndyq, kedergiler boldy. Dese de, búginde bul is óz júıesin tapqan. Sondyqtan, elordanyń barlyq turǵyndaryn jyljymaıtyn múlikke tehnıkalyq tólqujat pen onyń kóshirmesin alýda elektrondy júıeni paıdalanýǵa shaqyramyz. Sóıtip, aqparattyq-kommýnıkatıvtik tehnologııa damyǵan zamanda «Elektrondy úkimettiń» jetistikterin óz ıgilikterine jaratsyn degimiz keledi.
Ol qıyn emes. Áýeli, jeke kýáligińizdi jańasyna almastyryńyz. Onda chıp, onyń ishinde kodtar belgilenedi. Sol kodtar boıynsha sizge qoltańba beriledi. Qoltańbamen «Elektrondy úkimettiń» veb-portalyna kirip, qajetti qujatqa suraý salýǵa bolady. Elektrondy qoltańbany «E-gov» buryshynan nemese halyqqa qyzmet kórsetý ortalyqtarynan ala alasyz. Bul qolaılylyqtar halyqqa qyzmet kórsetýdi jeńildetýmen qatar, yqtımal paraqorlyqtyń jolyn kesedi. Elektrondy qoltańbamen qujat isindegi barlyq sharýany úıde otyryp-aq, táýliktiń kez kelgen ýaqytynda atqarýǵa múmkindik týǵan. Ortalyqqa «E-gov» portaly arqyly jibergen qujattaryńyz sol zamatta ázirlenip, oryndaýǵa jiberiledi. Taıaý bolashaqta, ortalyq qyzmeti tolyq birizdilikke túsip bolǵan soń, qujat daıyndaý ýaqytyn bir táýlikke deıin qysqartý kózdelgen.
Baıtaq Ádephanulynyń aıtýynsha, Astana men Almaty qalalarynda qanatqaqty rejimde júzege asyrylǵan baǵdarlamada árıne, kemshilikter men olqy tustar bolǵan. Búginde sol kemshilikter tolyqtyrylyp, baǵdarlama jetildirilip jatyr. Jyl sońyna qaraı tolyq jasaqtalǵan baǵdarlama respýblıkanyń barlyq aımaqtaryna jiberiletin bolady.
Nurbaı ELMURATOV,
«Egemen Qazaqstan».
