Aıtýly shara aıasynda Almatydaǵy «Alataý» dástúrli óner teatrynda Uly Otan soǵysynda eli men jerin janqııarlyqpen qorǵaǵan qazaqstandyq jaýyngerlerdiń erligin pash etip, ony keıingi jastarǵa úlgi-ónege etý maqsatynda keremet konserttik baǵdarlama uıymdastyryldy.
Konserttiń ashylý rásiminde Ulttyq ulan Bas qolbasshysynyń orynbasary general-maıor Muhametqalı Satov, Ulttyq ulan ardageri general-maıor Ámirbek Tógisov, Almaty qalalyq «Jas Otan» jastar qanaty fılıalynyń tóraǵasy Mádı Ahmetov sóz sóılep, Uly Otan soǵysy kezindegi qazaqstandyq jaýyngerlerdiń erligi men tyl eńbekkerleriniń eren eńbegi jaıynda keńinen baıandady.
- Fashıstik Germanııa basqynshylaryna qarsy surapyl soǵysta Qazaqstannyń jaýyngerleri kózsiz erlik kórsetkeni barshamyzǵa málim. Tylda qara jumysqa jegilgen azamattarymyzdyń da eńbegi eren. Sol ata-apalarymyz, áke-analarymyz, aǵa-tátelerimizdiń júrip ótken batyrlyq jolyn keıingi urpaqqa pash etip, sol arqyly Qazaqstannyń árbir azamatynyń boıyna otansúıgishtik sezimin sińirip, jáne de jastardy patrıottyq rýhta tárbıeleý maqsatynda bizder osy ıgi bastamany qolǵa aldyq. О́ıtkeni, halyq óz qaharmandaryn eshýaqytta umytpaýy kerek. Olardyń erligi árkez sanamyzda jańǵyryp otyrýy qajet, - deıdi general-maıor Muhametqalı Satov.
Konsertte Qazaqstan estradasynyń juldyzdary men Ulttyq ulannyń ánshileri qan maıdannyń qaharmandaryna arnalǵan «Katıýsha», «Álııa», «Jýravlı», «Smýglıanka», sonymen qatar patrıottyq rýhty oıatatyn «Jas qazaq», «El qorǵany», «Men – qazaqpyn», «Jasa, týǵan jer», «Atameken» jáne taǵy basqa ánderdi shyrqady. Al «Saltanat» bı ansambli «Qazaq bıin» naqyshyna keltirip oryndady.
Sóz oraıy kelgende, osy konserttik baǵdarlama Almaty qalasy ákimidigi jáne Ulttyq ulannyń qoldaýymen ótkeni jaıynda aıta ketken abzal.
