Qala ákimi Dáýren Mahajanovtyń sózine sensek, mundaı kórsetkishter 65 jyldyq tarıhy bar qalada buryn - sońdy bolmaǵan.
«Indýstrıaldy aımaqta 2,9 mlrd teńgege 10 jobany iske qosý josparlanǵan. Aýyl sharýashylyǵy salasyndaǵy basty baǵyt – azyq-túlik beldeýin quryp, jylyna 3 ret ónim jınaýdy júzege asyrý. Bul salaǵa ınvestısııa men ozyq tehnologııalardy tartý. Osyǵan oraı aýyl sharýashylyǵy kooperatıvterine biriktirý jumystaryn júrgizýdemiz», – dedi qala ákimi turǵyndarǵa bergen eseptik baıandamasynda.
Qalany tabıǵı gazben qamtamasyz etý jumystary qarqyndy júrýde. Tozyǵy jetken 300 kópqabatty turǵyn úıdi tolyq jóndeýden ótkizip, jańartý kózdelgen. Joldar jóndelip, kósheler jaryqtandyrylýda. Eki kópqabatty turǵyn úı paıdalanýǵa berilip, 10 úıdiń qurylysy júrip jatyr. Aldaǵy ýaqytta tennıs korty, basketbol, voleıbol, fýtbol alańshalary, velojol salynbaq.
Aýysymyna 500 kelýshini qabyldaıtyn jańa emhana boı kóterdi.
Eseptik kezdesýge qatysqan oblys ákimi О́mirzaq Shókeev Túrkistanmen birge Kentaý qalasy da qatar damıtyndyǵyn, jańa dáýiri bastalǵanyn atap ótti. Kópshilikti ıgi isterdiń júzege asýyna qoldaý kórsetýge shaqyrdy. Sondaı-aq kezdesýden soń oblys ákimi jańadan salynyp jatqan úılerdiń qurylysy men qalanyń jylý júıesine engizilgen jańa jobamen tanysty.
