Jambyl oblysynyń aktıvimen ótken keńeste A. Mamın Asqar Myrzahmetovtiń óńirdiń damýyna qosqan úlesin atap ótip, aımaq ákimi laýazymynda atqarǵan jumysy úshin alǵys bildirdi.
Jańa ákimdi tanystyrǵan Premer-Mınıstr onyń aımaqtyq jáne respýblıkalyq deńgeılerdegi basshylyq qyzmetterdegi jumys tájirıbesin atap ótti.
«Tuńǵysh Prezıdent – Elbasy Nursultan Ábishuly Nazarbaev pen Memleket basshysy Qasym-Jomart Kemeluly Toqaev Jambyl oblysynyń damýyna erekshe kóńil bóledi. Qazirgi tańda óńir basshylyǵynyń aldynda aýqymdy mindetter tur. Eń aldymen, ıdeologııalyq jumysqa jáne ultaralyq kelisimniń nyǵaıýyna, áleýmettik-ekonomıkalyq jaǵdaı men halyqtyń turmys sapasyn jaqsartýǵa basa nazar aýdarý qajet», — dedi A. Mamın.
Úkimet basshysy ekonomıkanyń turaqty damýyn, ınvestısııalar tartý, jańa jumys oryndaryn qurý, azamattardyń ómir súrý sapasyn jáne tabysyn arttyrý boıynsha mindetterdi sheshýdiń mańyzdylyǵyn atap ótti.
«Berdibek Mashbekulyna basshylyq qyzmetterdegi tájirıbesi men bilimi oblys aktıvimen jáne máslıhat depýtattarymen birlesip, Memleket basshysy alǵa qoıǵan mindetterdi sapaly oryndaýǵa múmkindik beretinine senimdimin», — dedi A. Mamın.
Kezdesýde oblystyq jáne qalalyq máslıhattardyń hatshylary Baǵlan Qarasholaqov pen Batyrbek Kúlekeev, Taraz ınnovasııalyq-gýmanıtarlyq ýnıversıtetiniń rektory Erbolat Saýryqov pen «Qazfosfat» JShS bas dırektory Muqash Eskendirov sóz sóılep, Memleket basshysy usynǵan Berdibek Saparbaevtyń kandıdatýrasyna qoldaý bildirdi jáne Jambyl oblysynyń jańa ákimine tabysty ári jemisti jumys tiledi.
Berdibek Saparbaev 1953 jyly Qyzylorda oblysynda dúnıege kelgen. Eńbek jolyn 1969 jyly «Zadarınskıı» sovhozynyń jumysshysy retinde bastaǵan. 1977 jyly Almaty Halyq sharýashylyǵy ınstıtýtyn ekonomıst mamandyǵy boıynsha bitirdi. Instıtýtty bitirisimen Respýblıkalyq memlekettik eńbek jınaqtaý kassalary basqarmasynda ekonomıst bolyp eńbek etti.
Túrli jyldary Berdibek Saparbaev Prezıdent Apparatynda, Mınıstrler kabıneti Apparatynda, QazKSR Qarjy mınıstrliginde, Kedendik baqylaý agenttigi men komıtetinde, Qarjy mınıstrliginde basshylyq qyzmetterdi atqarǵan. Qyzylorda, Ońtústik Qazaqstan, Shyǵys Qazaqstan, Aqtóbe oblystarynyń ákimi, ekonomıka jáne bıýdjettik josparlaý vıse-mınıstri, eńbek jáne halyqty áleýmettik qorǵaý mınıstri qyzmetterin atqarǵan. 2019 jylǵy tamyzdan bastap Premer-Mınıstrdiń orynbasary laýazymyn atqardy.
