Kúni keshe Jetisaı aýdanyndaǵy Aǵynsaı jáne Útirtóbe aýylynyń 300-ge jýyq otbasy kópten kútken «kógildir otynǵa» qol jetkizdi. Aýdandyq turǵyn úı, kommýnaldy-sharýashylyq bólimi qyzmetkerleriniń málimetinshe, aldaǵy ýaqytta J.Eralıev aýyldyq okrýgine qarasty Kóktóbe aýylyna da gaz berý jumystary júrgizilip jatyr.
Sondaı-aq Tólebı aýdanyndaǵy 9 eldi mekenge tabıǵı gaz berile bastady. Túrkistan oblysy ákiminiń orynbasary Meıirjan Myrzalıev pen aýdan ákimi Baýyrjan Omarbekov eldi mekenderde bolyp, turǵyndardyń qýanyshyna ortaqtasty. Respýblıkalyq bıýdjet esebinen 1 mlrd 988 mln teńgege Tasaryq aýyldyq okrýgindegi Tasaryq, Jambyl, Hanaryq, Ońtústik jáne Qaratóbe aýyldyq okrýgindegi Maıbulaq, Qostóbe, Qaratóbe, Baldyberek, Tóńkeris eldi mekenderine gaz qubyrynyń qurylysy 2017-2019 jyldar aralyǵynda júrgizilgen bolatyn. Búginde 9 eldi meken boıynsha 1542 abonenttiń 793-ine tehnıkalyq sharttar alynyp, ishki gaz qubyrlary júrgizilgen. Kúni keshe paıdalanýǵa berilgen gaz júıesin qosqanda, aýdan kólemindegi 55 eldi mekenniń 48-i tabıǵı gaz júıesimen qamtylmaq.
«Aýdanda Qoǵaly jáne Qasqasý aýyldyq okrýgteriniń 7 eldi mekenin tabıǵı gazben qamtamasyz etý úshin jobalaý-smetalyq qujattamasy ázirlenip, saraptamanyń oń qorytyndysy alyndy. Smetalyq quny 1,269 mlrd teńgeni quraıdy. Jobany qarjylandyrý úshin 2020 jylǵa arnalǵan respýblıkalyq jáne oblystyq bıýdjetke usynylyp, qarjylandyrý kútilýde. Joba qanaǵattandyrylǵan jaǵdaıda Tólebı aýdanynyń 55 eldi mekeniniń 118 600 turǵyny 100% tabıǵı gazben qamtamasyz etiletin bolady», - deıdi aýdannyń gazǵa jaýapty mamandary.
Degenmen, oblystaǵy keı aýyl turǵyndary gaz jetkizilgenimen, úılerge «kógildir otyn» berilmeı otyrǵanyn aıtýda. Aýylǵa gaz jetkizilgen, úıde joq. Bul másele turǵyndar men «QazTransGazAımaq» AQ-y arasynda júrgiziletin qarjylyq-tehnıkalyq jumystardyń baıaýlyǵynan nemese bir júıege qoıylmaǵanynan týyndap otyrǵanyn aıtýshylar kóp. Iаǵnı jergilikti ákimder aýyldarǵa gaz jetkizip, mindetinen qutyldy, endigi másele jaýapty mekeme men turǵyndardyń ózderine baılanysty bolyp otyr.
