Bolashaqta elimizde mundaı keleńsiz oqıǵalardy boldyrmaý úshin tek Qazaqstan halqy Assambleıasy ǵana emes, qoǵam bolyp jastarymyzǵa tárbıe berý isin qolǵa alýymyz qajet. Jastarǵa tárbıe berý men túsindirý jumystary durys júrgizilgende mundaı buzaqylyqtarǵa jol berilmes edi. Bizdiń basty memlekettik qundylyǵymyz – ulttar arasyndaǵy birlik pen tatýlyq, aýyzbirshilik. Sol sebepti bereke-birligimizdi buzatyndar, memleketimizdiń múddesine zııan keltiretinder zań júzinde jaýapqa tartylýy tıis dep oılaımyn.
Aýǵanstandaǵy soǵysqa qatysqan jaýynger-ınternasıonalıst retinde aıtarym, ondaı zulmat soǵys bolmasyn, elimiz tynysh bolsyn deımin. Aýǵanstanda men qyzmet etken áskerı bólimshede Keńes Odaǵyndaǵy barlyq ult ókilderi boldy. Vzvodta 17 adam 10 ulttan edik. Bárimiz bir otbasynyń balasyndaı qyzmet ettik. О́zderińiz biletindeı, 15 aqpan – Úkimet qaýlysymen Aýǵanstan Demokratııalyq Respýblıkasynan Keńes áskerleriniń shekteýli kontıngentiniń shyǵarylǵan kúni – mereke kúni dep belgilendi. Osy mereke kúni jáne basqa ýaqyttarda da aýǵan soǵysynyń ardagerleri mektepterde, arnaıy bilim beretin oqý oryndarynda, JOO-da patrıottyq mazmunda is-sharalar ótkizedi. Mundaı is-sharalar óskeleń urpaqtyń boıynda patrıottyq sezim uıalatyp, rýhanı jáne tarıhı qundylyqtardy qasterleýge úıretedi. Jastardyń soǵys jaıynda ardagerlerdiń óz aýzynan estýi basqasha áser qaldyrady. Osyndaı tárbıelik is-sharalarǵa kóp mán beretin bolsaq, joǵarydaǵydaı keleńsiz jaǵdaılar oryn almas edi. Buzaqylyq ult tańdamaıdy. Áleýmettik jelilerde ár túrli pikirler aıtylýda. Biz sabyrlyq tanytýymyz kerek.
О́zderińizge belgili, bıyl Ekinshi dúnıejúlik soǵystaǵy Jeńiske 75 jyl tolady. Ata-babalarymyz ár túrli ulttarmen birge júrip soǵysty, jerimizdi basqynshylardan azat etti. Elimizdiń tynyshtyǵy úshin kúresti. Al, Aýǵan jerinde azamat soǵysy áli jalǵasýda. Soǵysty kitaptan oqyp, kınodan kórip emes, óz kózimen kórgen kýáger retinde aıtarym, eshqandaı janjal, soǵys bolmasyn, elimiz aman, jurtymyz tynysh bolsyn.
Qazir elimiz jyl ótken saıyn ekonomıkalyq, áleýmettik, mádenı jaǵynan damyp kele jatyr. Memleket tarapynan halyqqa arnalǵan kóptegen baǵdarlamalar júzege asyrylýda. Elimizdiń bolashaǵy, memlekettiligimizdiń nyǵaıýy turaqtylyq pen beıbitshilikke baılanysty. Sol sebepti qoǵam bolyp, el bolyp tynyshtyqty saqtaýǵa tıispiz. Ultaralyq, dinaralyq kelisimdi nyǵaıtyp, ortaq úıimiz – Qazaqstanda birlik pen tatýlyqta ómir súrýimiz qajet.
Jankeldi MAHAShOV,
Aýǵanstandaǵy soǵys ardagerleriniń «Aýǵanstan ardagerleri» respýblıkalyq qoǵamdyq birlestiginiń tóraǵasy
