Berdibek Saparbaev Taraz qalasyndaǵy bazarlardyń jaı-kúıimen tanysyp, birqatar azyq-túlik saýda oryndary men qalanyń áleýmettik nysandaryn aralady. Ákim áýeli «Aýyl bereke» bazarynda bolyp, halyq jıi tutynatyn azyq-túlik túrleriniń sapasymen jáne baǵasymen tanysty. Satýshylar men satyp alýshylarmen sóılesti. Qarapaıym halyqtyń pikirin tyńdady. Bul rette Berdibek Saparbaev Taraz qalasynyń ákimi Aıtqazy Qarabalaevqa taıaý arada sheshimi tabylýy kerek birqatar máseleler týraly aıtty. Onyń ishinde saýda oryndarynyń durys ornalaspaýy, órt qaýipsizdigi erejeleriniń saqtalmaýy, asfalttanǵan avtoturaqtardyń bolmaýy, bazar aýmaǵyndaǵy kólikterdiń jónsiz qozǵalysy, bazar sóresinde jergilikti taýar óndirýshilerdiń ónimderin kóbeıtý syndy máseleler de bar.
«Bazar aýmaǵy men saýda qatarlary joǵary estetıkalyq talǵamǵa saı kelýi kerek. Kún saıyn munda bizdiń qalanyń myńdaǵan turǵyny keledi. Sondyqtan bazarda órt qaýipsizdigi erejeleriniń saqtalǵany jón. Sondaı-aq satyp alýshylar men satýshylarǵa da ońtaıly jaǵdaı jasaýǵa basa nazar aýdarý mańyzdy», dedi Berdibek Saparbaev. Ákim taýar baǵasy turaqtylyǵyna basa nazar aýdaryp, kúndelikti tutynatyn turmystyq zattardyń qymbattamaýyn qadaǵalaýdy tapsyrdy. Qaladaǵy áleýmettik bazardy aralaý kezinde omartashylar bal ónimderin ótkizý máselesin de kóterdi. Berdibek Saparbaev jergilikti aýyl sharýashylyǵy taýaryn óńdeýshilerge qoldaý kórsetip, joǵarydaǵy máseleniń óz deńgeıinde sheshilýine yqpal etýge ýáde berdi. Sonymen qatar ákim «Small» saýda ortalyǵynda da bolyp, azyq-túlik taýarlarynyń túrleri men baǵalaryn salystyryp kórdi.
Saýda oryndarymen qatar, Berdibek Saparbaev olımpıada rezervterin daıarlaý ortalyǵynda , bazardaǵy veterınarııalyq zerthanada jáne Qarataı Turysov atyndaǵy №53 mektep-gımnazııasynda bolyp, mundaǵy birqatar máselelerge de nazar aýdardy.
Jambyl oblysy
