Respýblıkalyq konferensııany ál-Farabı ortalyǵynyń dırektory Bekjan Meıirbaev ashyp, negizgi talqylanatyn máselelermen tanystyryp ótti.
Uly tulǵalardyń ómiri men shyǵarmashylyǵyna arnalǵan konferensııanyń basty ereksheligi «Jıdebaı-Bórili» memlekettik tarıhı-mádenı jáne ádebı-memorıaldyq qoryq-mýzeıiniń Abaıdyń ómiri men shyǵarmashylyǵymen baılanysty kórmesimen ushtastyryla ótkizilýinde. Atalǵan mýzeıdiń ǵylymı hatshysy Raýshan Elekenova kórmeniń barysynan, sondaı-aq mýzeıde jasalyp jatqan ǵylymı-zertteý jumystarynan da habardar etti.
Kelesi kezekte sóz alǵan ál-Farabı ortalyǵynyń ǵylymı keńesshisi, fılosofııa ǵylymdarynyń doktory Jaqypbek Altaev qazaq jerine Farabı iliminiń kelýinen bastap kúni búginge deıingi zertteý salasyndaǵy jumystar jaıynda baıandap berdi. Sonymen qatar ál-Farabı ilimin zerttegen otandyq ǵalymdardyń shyǵarmashylyǵynan aqparat berip ótken ǵalym uly oıshyl týraly jaryqqa shyqqan eńbekter barysyna da toqtaldy.
Ál-farabıtanýshy, abaıtanýshy ǵalymdar, qoǵam qaıratkerleri, ustazdar men stýdentter qatysqan konferensııada «100 kitap» jobasy aıasynda uly tulǵalardyń ómiri men baı mádenı shyǵarmashylyǵyna qatysty ǵylym men bilim berýdiń ádisnamalyq jáne praktıkalyq máseleleri talqylandy. Onyń barysynda «ál-Farabı – Abaı: rýhanı sabaqtastyq máselesi», «Keńestik kezeńdegi farabıtaný, abaıtanýdyń zerttelýi», «Táýelsizdik kezeńde farabıtanýdyń, abaıtanýdyń damýy», «Orta jáne joǵary bilim berý júıesinde farabıtaný, abaıtanýdy oqytý» máselelerine qatysty mamandardyń zertteýleri kópshilik nazaryna usynyldy.
ALMATY
