Jazýshy Dıdahmet Áshimhannyń 70 jyldyǵy О́skemende bastaldy

Rýhanııat • 22 Aqpan, 2020

Jazýshy Dıdahmet Áshimhannyń 70 jyldyǵy О́skemende bastaldy

240 ret kórsetildi

Bul kisiniń oılary, tolǵamdary óńirlik sheńberde emes, ulttyq, memlekettik aýqymda.

О́skemendegi oblystyq Balalar jáne jasóspirimder kitaphanasynda belgili jazýshy, pýblısıst Dıdahmet Áshimhanovtyń 70 jyldyǵyna oraı «Jer ańsaǵan Saryatan» atty kesh ótti.

kesh

Keshke Almatydan arnaıy kelgen qalamgerdiń uly Dáýlet Áshimhan kitaphana ujymyna alǵysyn bildirip: «Bıyl ákemiz týyp-ósken Shyǵys óńirinde birqatar sharalar uıymdastyrmaq oıdamyz. Toıdyń basy О́skemennen bastaý alǵanyna qýanyshtymyn» dep rızashylyǵyn jetkizdi.

Kesh júrgizýshisi Altynǵadys Kúntýǵanulynyń «Ákeńiz nesimen este qaldy?» degen suraǵyna: «Ákemiz áýelde qatal edi. Keıin 14-15 jasqa kelgennen soń dos bolyp kettik desem artyq aıtpaspyn. Ázildesip, qaljyńdasyp júretinbiz. Teń dárejede sóılesetin. Ákemniń maǵan bergen tárbıesi – meni janynan qaldyrmaıtyn. Ákemniń janynda júrip Qalıhan Ysqaq, Ákim Tarazı sekildi tulǵalardyń áńgimelerin estidim. Úlkenderdiń sózin tyńdap óstim. Munyń maǵan kóp paıdasy tıdi» dep jaýap berdi.

kún

Qalamgerdi eske alý keshine qatysqan, sóz zergerimen aralas-quralas bolǵan, jerlesi Álibek Qańtarbaev zamandasy jaıynda áserli estelik aıtty. «Dıdahmettiń menen eki-úsh jas kishiligi bar. Shyńǵystaıda ınternatta birge turdyq. Áshimhan aqsaqal qoıda bolǵandyqtan barlyq balalary ınternatta turdy. Ishindegi eresegi Dıdahmet edi. Týǵan-týysqanǵa degen súıispenshiligi keremet edi. Internatta áskerdegi sııaqty ǵoı. Úlkender zorlyq-zombylyqty kóp jasaıtyn. Baýyrlaryna alańdap, shyj-byj bolyp solarǵa ara túsip júretin. Sodan keıin kómekke meni shaqyratyn. Balalyq kez. Internatta tamaqty shaqtap beretin. Álgisinen jyryp, maǵan ákeledi. Ol endi qazirgishe aıtsaq, sybaılas jemqorlyq. Bir-eki kámpıtin jep alǵannan keıin Dıdahmetterge eshkimdi tıiskizbeıtinmin. Men 11 synypta oqyǵanda Dıdahmet 8 oqyp júrdi. Sol kezde aýdandyq gazettiń bir jaq jetim buryshyna «Shyrqal, án» degen úsh shýmaq óleńi basyldy. Oıbaı-aý, sonda úlken bir klassıkalyq dúnıe týǵyzǵandaı aıryqsha qýanyp, jalǵyz bir aq kóılegin kıip alyp, anda da, mynda da bezektep júgirgeni esimde. Tuńǵysh shyǵarmashylyq jemisi edi bul» dedi jazýshy ótken kúnderge saǵyna eske alyp.

Keshke qatysqan belgili aqyn, О́skemen qalalyq Ishki saıasat, Mádenıet jáne tilderdi damytý bóliminiń basshysy Qalqaman Sarın jazýshy mereıtoıy qalalyq, oblystyq deńgeıde emes, respýblıka deńgeıinde atalyp ótse de jarasymdy ekendigin atap ótti. «О́ıtkeni, bul kisiniń oılary, tolǵamdary óńirlik sheńberde emes, ulttyq, memlekettik aýqymda. Sondyqtan bul mereıtoı tutas halyqtyń, ádebıettiń merekesine aınalady dep oılaımyn» dedi ol.

Shara barysynda sóz sóılegen ǵalym-zertteýshiler Baqytjan Kelgenbaeva men Aıjan Qartaeva Dıdahmet Áshimhan shyǵarmashylyǵy san qatparly, kóp zertteýdi qajet etetindigin tilge tıek etti. Aqyn Áskerhan Aqtaı qalamgerdiń «Jyndy jel» áńgimesiniń sahnalyq nusqasyn ázirlegenin súıinshilep: «Birneshe teatrlarǵa usyndym. Buıyrsa, 2021 jyly Almatydaǵy Áýezov teatrynda qoıylýy múmkin. Qyzylorda oblystyq drama teatry da qyzyǵýshylyq tanytyp otyr. Bıyl eń áýeli О́skemendegi drama teatrda qoıylsa jaqsy bolar edi» dedi.

О́skemendik jýrnalıst, sýretshi Mereı Qaınarov jazýshynyń 70 jyldyǵyna oraı respýblıkalyq sýretshiler baıqaýy uıymdastyrylyp jatqanyn habarlap, ótinimder 25 naýryzǵa deıin qabyldanatynyn jetkizdi.

Kesh barysynda Dıdahmet Áshimhannyń ómirden ótken soń jaryq kórgen «Kesh» atty kitabynyń da tanystyrylymy ótip, kitaphana ujymy men oqyrmandarǵa tabystaldy.

О́SKEMEN

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz