Túrkistan oblysyna arnaıy issaparmen kelgen «Mindetti áleýmettik saqtandyrý qory» AQ basqarma tóraǵasy Aıbatyr Jumaǵulov osyndaı derekterdi málim etti. Saryaǵash aýdanyndaǵy birqatar medısınalyq mekemelerdi aralap, eldi mekenderdegi mindetti áleýmettik saqtandyrý júıesiniń jumysymen tanysqan basqarma tóraǵasy aýdandyq ortalyq aýrýhanasynda MÁMS júıesi arqyly tegin em qabyldap jatqan naýqastarǵa jańa jobanyń artyqshylyqtaryn túsindirdi. Aýdandyq ortalyq aýrýhanaǵa 188 803 turǵyn tirkelgen. Búginde saqtandyrylǵan turǵyndar emhanada kompıýterlik tomografııa men magnıtti rezonansty tomografııadan tegin óte alady. MÁMS aıasynda alǵashqy medıko-sanıtarlyq, balalarǵa, eresekterge mamandandyrylǵan medısınalyq kómekter kórsetýmen aınalysatyn medısınalyq uıymdardyń múmkindigi keńeıe túsken. Jańa júıe aıasynda aýyl medısınasyna jiti nazar aýdarylýda.
Búginde aýdan kóleminde jańadan birneshe bastapqy medısınalyq - sanıtarlyq kómek kórsetý ortalyqtary ashylǵan. Basqarma tóraǵasy solardyń qataryna kiretin «Kóktóbe» medısınalyq mekemesinde de boldy. Ortalyqta kardıolog, hırýrg, stomatolog beıindi mamandar 20239 naýqasqa qyzmet kórsetip keledi. Onda 15 dáriger, 76 orta medısına qyzmetkeri jumys isteıdi. Aıta keterligi, buryn aýyl turǵyndary beıindi mamandardyń kómegin aýdandyq aýrýhanadan alatyn bolsa, qazir óz aýylynda ornalasqan emhana kómegine júginedi.
Túrkistan oblysy
