«Áskerı ónim» baǵdarlamasynyń kelesi kezeńi qashan bastalady?

Aımaqtar • 26 Aqpan, 2020

«Áskerı ónim» baǵdarlamasynyń kelesi kezeńi qashan bastalady?

28 ret kórsetildi

«Turǵyn úı qurylys jınaq bankinde» bolashaq baspanalaryna qarajat jınap júrgen jáne turǵyn úı tólemderin alatyn 3000 qazaqstandyq áskerıler men arnaıy organ qyzmetkerlerine SMS-habarlama jiberildi. Onda «Áskerı ónim» baǵdarlamasynyń kelesi kezeńiniń bastalý merzimi men ótinim berý úshin Turǵyn úı qurylys jınaq bankine qashan habarlasý kerektigi jaıynda aqparat kórsetilgen.

Elvıra SERIKQYZY

Banktiń Baspasóz málimetterine súıensek, 2020 jyly «Áskerı ónim» baǵdarlamasy boıynsha jeńildetilgen nesıe berý maqsatynda 60 mlrd teńge bólindi. Bank árbir klıent úshin ýaqyttyń qymbat ekendigin jaqsy biledi. Osyǵan oraı, Baǵdarlama boıynsha zaım alatyn úmitkerler tizimin turǵyn úı tólemderin alýshylardyń jınaǵan somasyna jáne de ótinimdi berý merzimine saı jasady.

Bul tizimge 2020 jyldyń 1 qańtaryna deıin ortasha nesıe somasynyń - Nur-Sultan jáne Almaty qalalary boıynsha 25 mln.teńge, al qalǵan aımaqtar boıynsha 15 mln.teńge - 10%-49%-yn jınaǵan úmitkerler kiredi.

Jalpy alǵanda tizimge shamamen 3 myń adam alyndy. Eń aldymen 49% kóleminde qarajat jınaǵandar, al odan keıin qarajat kólemine saı eń kóbinen eń tómengisine deıingi salymy bar úmitkerler irikteldi. Tizimniń basynda turǵan azamattar qazirdiń ózinde nesıe alý úshin ótinim bere alady. SMS-habarlamada olardyń Turǵyn úı qurylys jınaq bankine qaı merzim ishinde barý kerektigi kórsetilgen. Al, merzimi keıinge qaldyrylǵan úmitkerlerge bank belgilengen ýaqytqa deıin bir aı qalǵanda qosymsha habarlama jiberedi. Bul aqparatty úmitker, sondaı-aq, ınternet-bankıngtegi Jeke kabınetinde de qaraı alady.

Áskerı qyzmetkerlerdiń óz ýaqytyn durys josparlap, qajetti qujattardy daıyndap úlgerýi úshin, árbir úmitkerge nesıe ótinimin joldaý maqsatynda eki aı kóleminde ýaqyt beriledi. Máselen, eger ótinim berý merzimi retinde sáýir aıy kórsetilse, onda úmitker nesıe alý úshin ótinimin 2020 jyldyń 1 sáýirinen bastap 2020 jyldyń 29 mamyryna deıin tapsyra alady.

«Áskerı ónim» baǵdarlamasy boıynsha zaım alý sharttary ózgertilmedi. Zaım jańa nemese qoldanystaǵy úıden páter alýǵa jáne oǵan jóndeý jumystaryn júrgizýge, sondaı-aq, úlestik qatysý kelisimsharty boıynsha beriledi. Baǵdarlama talaptaryna saı, bastapqy jarna mólsheri 15%-dy, zaım boıynsha syıaqy mólsherlemesi – 8%-dy, al nesıelendirý merzimi – 25 jylǵa deıingi ýaqytty quraıdy.

Al endi eń únemshil salymshylar úshin qajetti zaım somasynyń 50%-na deıingi mólsherde qarajat salý múmkindigi bar áskerı qyzmetkerler ózderi qalaǵan ýaqyt ishinde jyldyq 6% mólsherlememen zaım ala alady. Zaımnyń bul túrin bank belgilegen tizimnen tys turǵyn úı tólemderin alatyn barlyq salymshylar rásimdeı alady

Atalǵan ónimge degen suranys pen áskerı qyzmetkerlerdiń ótinimderine baılanysty «Turǵyn úı qurylys jınaq banki» osy jyly atalǵan baǵdarlamany keńeıtý múmkindigin qarastyrýǵa daıyn.

ALMATY

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz