«2020 jyldyń 6 qańtarynan bastap Densaýlyq saqtaý mınıstrligi memlekettik shekarany ótkizý pýnktterinde sanıtarlyq baqylaýdy kúsheıtip, mıllıonnan astam adamdy tekserip qarady. Búgingi kúni baqylaýǵa 30 myńnan astam adam alyndy. Inkýbasııalyq kezeńniń aıaqtalýyna baılanysty baqylaýdan azamattardyń negizgi bóligi shyǵaryldy. 6 474 adam áli de baqylaýda», - dedi Densaýlyq saqtaý mınıstri.
Úkimet otyrysynda, Eljan Birtanovtyń aıtýynsha, 6 qańtardan bastap qazirgi ýaqytqa deıin dene qyzýy kóterilip, jedel respıratorlyq-vırýstyq ınfeksııamen aýyrǵan 186 adam aýrýhanaǵa jatqyzylyp, olardyń 166-y jazylyp shyqqan. Qalǵan 20 adam stasıonarda em alýda. Olardan koronavırýs ınfeksııasy tabylmady.
«Syrqattardan alynǵan synamalar Reseı, Qytaı jáne otandyq óndiristiń test-júıelerimen zertteldi. Barlyq testter Dúnıejúzilik densaýlyq saqtaý uıymymen valıdasııalandy. Osylaısha, qazirgi tańda barlyǵy 967 adam zerthanalyq tekserýden ótti. Onyń ishinde 544 adam Qytaı Halyq Respýblıkasy men Japonııadan kelgen. 423 adam koronavırýs kúdigimen aýrýhanaǵa jatqyzylǵan nemese naýqastarmen baılanysta bolǵan», - deıdi Densaýlyq saqtaý mınıstri Eljan Birtanov.
Qazirgi ýaqytta Úkimet rezervinen qarajat bólinip, koronavırýs anyqtalǵan jaǵdaı men vırýs taralǵan elderden kelgen adamdardy karantınge ornalastyrý maqsatynda medısınalyq uıymdardyń daıyndyǵy qamtamasyz etilip otyr.
