Oblys ortalyǵynda júretin №18 avtobýstyń ekinshi qabatyna «Jeńiske jol» taqyrybyn qamtıtyn eksponattar qoıylyp, mýzeı qyzmetkerleri jolaýshylarǵa ár jádigerdiń tarıhyn, qaharman qostanaılyqtardyń maıdandaǵy erligin baıan etedi. Tarıhı-tanymdyq máni zor ekspozısııa qala kóshelerin aıyna bir ret mamyrdyń sońyna deıin aralaıdy.
Osymen ekinshi ret jolǵa shyqqan kólik-mýzeı jolaýshylarǵa qostanaılyq maıdangerlerdiń týys-týǵandaryna jazǵan saǵynyshqa toly hattarynyń kóshirmelerin úlestirip, tarıhyn áńgimeledi. Búginde sarǵaıyp, jazýy kómeski tarta bastaǵan maıdan hattary Otanǵa, týǵan jer men ata-anaǵa, baýyr-qaryndasqa degen ystyq súıispenshilikke toly. Úshkil hattarda «men tirimin» nemese «urysqa kirgeli turmyz» degen tirkester jıi kezdesedi. Ásirese qaharman ushqysh Ivan Pavlovtyń Shyǵys Prýssııadan jazǵan haty erekshe áser qaldyrady. Maıdanger 2 bet qaǵazdy ata-anasy men baýyrynyń, eldiń jaǵdaıyn suraýmen toltyrǵan. Hat sońynda «Men Keńes Odaǵynyń Batyry ataǵyn 2-shi márte aldym», dep qysqa ǵana qaıyrady.
1942 jyly soǵysqa Meńdiǵara aýdanynan attanǵan Iýrıı Gvozdevtiń haty da erekshe.
– Ol óziniń bir hatynda soǵys aıaqtalǵan soń teńiz ýchılıshesine oqýǵa túskisi keletinin baıandaǵan. Biraq, ókinishke qaraı, soǵysta qaza taýyp, armany oryndalmaı qaldy. Mýzeı qorynda Iýrıı Gvozdevtiń qarýlas dostarynyń maıdangerdiń inisine jazǵan qaraly hat bar, – deıdi murajaıdyń bólim meńgerýshisi Baqytgúl Muratbekova.
О́lketaný mýzeıiniń qorynda maıdannan kelgen 100-ge jýyq hat saqtalǵan. О́leńmen jazylǵan hattar da kezdesedi. Olardy tolqymaı oqý múmkin emes. Ot pen oqtyń ortasynda qaza tapqan jaýyngerlerdiń júrek tusyndaǵy qoıyn qaltasynan shyqqan hattar búginde murajaı qorynyń qundy jádigerine aınalǵan.
QOSTANAI
