Hokkeı. Elimizdiń eki qalasynda shaıbaly hokkeıden Qazaqstan kýbogy jarysy bastaldy. Bıyl el kýbogynyń toptyq oıyndary Kókshetaý men Temirtaýda ótedi.
Hokkeı. Elimizdiń eki qalasynda shaıbaly hokkeıden Qazaqstan kýbogy jarysy bastaldy. Bıyl el kýbogynyń toptyq oıyndary Kókshetaý men Temirtaýda ótedi.Bıylǵy Kýbok dodasyna eki topqa bólingen on komanda qatysady. «A» tobynda «Ertis» (Pavlodar), «Arystan» (Temirtaý), «Gornıak» (Rýdnyı), «Astana» (Astana), «Torpedo» (О́skemen) oınasa, «V» tobynda «Beıbarys» (Atyraý), «Arlan» (Kókshetaý), «Almaty» (Almaty), «Nomad» (Astana), «Búrkit» (Qaraǵandy) komandalary kúsh synasady.
Fınaldyq oıyndar 27 tamyzda Kókshetaýda ótedi.
Kúres. Bolgarııanyń astanasy Sofııada kúres túrlerinen jastar arasynda ótken álem chempıonatynda grek-rım kúresinen Aqan Baımaǵanbetov, erkin kúreste Ernur Qabataev jeńis tuǵyrynyń úshinshi satysyna kóterildi.
Álem chempıonatynda jalpykomandalyq esepte medaldar jáne upaı sany boıynsha Reseı quramasy kósh bastady. Al Qazaqstan komandasy kúrestiń úsh túrin qosqanda medal sany boıynsha 17-18-orynnan bolsa, upaı sanynan 12-orynnan kórindi.
Júzý. Kanadanyń Monreal qalasynda sýǵa júzýden múgedek sportshylar arasynda ótken álem chempıonatynda 50 metrge erkin júzýden áıelder arasynda S3 tobynda jarysqa qatysqan Qazaqstan Paralımpıadalyq quramasynyń múshesi, halyqaralyq dárejedegi sport sheberi Zúlfııa Ǵabıdýllına 0:47.40 sekýndtyq nátıjemen álem rekordyna túzetý engizdi.
Ol osydan keıin de toqtaǵan joq. Kelesi kúni Zúlfııa 0:47.79 sekýnd kórsetkishpen álem chempıonatynyń kúmis júldegeri atandy. Budan keıin ol qola júldeni jeńip aldy. Bul joly ol 50 metrge shalqalap júzýden úshinshi oryn aldy. Daryndy sportshy munymen de toqtalmaı, 100 metrge erkin júzýden taǵy bir qola júldeni ıelenip, álem chempıonatynyń úshinshi júldesine ıe boldy.
Regbı. 22-24 tamyz aralyǵynda Astanada erler komandalary arasynda regbı 7-den Qazaqstannyń ashyq chempıonatynyń IV týry ótedi.
Qazaqstan chempıonatyna «Dınamo-SKR Almaty», PRK «Olımp» (Taldyqorǵan), «Dınamo» (Shymkent), VKS – №1 ORBJSM (Almaty), «Kaspıı» (Aqtaý), №2 BJSMOR (Almaty), Qostanaı oblysynyń IID, «Qarasaı Eýrazııa Sport» (Qaskeleń), «Barys» (Jambyl oblysy), «Ýnıversıtet» (Pavlodar) jáne elordalyq «Astana» komandasy qatysady.
Regbı-7 Qazaqstan chempıonaty 17-20 mamyr kúnderi Almatyda bastaldy. Qazir týrnır kestesinde «Dınamo-SKR Almaty» (Almaty) 63 upaımen alda keledi. Odan keıin Taldyqorǵannyń PRK «Olımp» komandasy 57 upaımen tursa, «Astana» klýby 49 upaımen úshinshi orynda tur.
Fýtbol. Jaqynda Sport jáne dene shynyqtyrý isteri agenttigi «AstanaArena» stadıonynda Sport kúnine baılanysty shaǵyn fýtboldan týrnır ótkizdi.
Oǵan agenttiktiń, respýblıkalyq «Saryarqa» velotreginiń, Ulttyq shtattaǵy komandalar jáne sport rezervi dıreksııasynyń, Qajymuqan Muńaıtpasuly atyndaǵy sportta daryndy balalarǵa arnalǵan respýblıkalyq mektep-ınternattyń qurama komandalary men «Egemen Qazaqstan» gazetiniń komandasy men astanalyq jýrnalısterdiń «Qalamger» komandasy qatysty.
Jarysta bas júldeni «Saryarqa» velotreginiń komandasy jeńip aldy. Jýrnalısterdiń «Qalamger» komandasy ekinshi, Qajymuqan Munaıtpasuly atyndaǵy sportta daryndy balalarǵa arnalǵan respýblıkalyq mektep-ınternattyń qurama komandasy úshinshi oryndy ıelendi.
«Egemen-aqparat».
